Nos Wernhardus dei gratia ecclesie Pataviensis episcopus presentibus confitemur, quod diuini cultus augmentum in nostra dyocesi paterna sollicitudine promouere cupientes, donacionem iuris patronatus parrochialis ecclesie in Randek quam reuerendus in Christo pater dominus Emicho Frisingensis ecclesie venerabilis episcopus de liberali assensu capituli sui fecit nouelle plantacioni ecclesie sancte Marie prope Randekk ordinis sancti Benedicti, cui loco, conformitate religionis et situs aptitudine persuadentibus titulum nomenque inposuimus Vallis beate Virginis quod wlgariter Vnser frovn tal dici volumus, auctoritate ordinaria confirmauimus, ipsam ratam et inconuulsam perpetuis temporibus decernentes. Verum quia sine temporalibus spiritualia non possunt subsistere, vt abbatissa et sanctimoniales in eodem loco domino perpetuo seruiture dum ad necessitatem habuerint, temporalia fiducialiter appetant sempiterna tantoque contemplacioni feruencius inhereant, quanto largioribus stipendiis sunt subfulte, ecce prouentus et fructus memorate ecclesie in Randek cum omni commodo et vtilitate mense ipsarum donamus et annectimus benigno et liberali venerabilis capituli nostri accedente consensu, ita tamen quod propter huiusmodi gratiam ecclesia in Randek et plebs eidem attinens debitis non fraudentur obsequiis, set per duos capellanos ydoneos abbatisse que pro tempore in dicto loco fuerit, quorum correctionem nobis nostrisque successoribus reseruamus, sollicite et fideliter gubernentur. In cuius rei perpetuam memoriam et firmamentum presentes dedimus literas nostro et venerabilis capituli nostri sigillis appendentibus communitam. Datum et actum Patauie, anno domini M. ducentesimo nonagesimo sexto, XI. kal. Januarii.

Source Fulltext: ZAHN, Codex Diplomaticus (=FRA II/31, Wien 1870) S. 458