Bonifacius episcopus seruus seruorum dei. Dilectis filiis . . . abbati monasterii in Seydeinsteten et . . . preposito sancti Virgilii ecclesie in Frisaco ac . . . . plebano plebis in Judenburga Salczpurgensis et Patauiensis dyocesium salutem et apostolicum benedictionem. Sua nobis Hugo rector ecclesie sancti Petri prope Welcz Salczpurgensis dyocesis peticione monstrauit, quod cum venerabilis frater noster . . . Lauentinus episcopus, falso asserens predictam ecclesiam sancti Petri ad mensam suam episcopalem spectare et quod idem Hugo super eadem ecclesia iniuriabatur eidem, ipsum super hoc coram venerabili fratre nostro Chunrado archiepiscopo Salczpurgensi auctoritate ordinaria traxisset in causam, demum . . . . archidyaconus Gurcensis cui prefatus archiepiscopus huiusmodi causam audiendam commiserat et fine debito terminandam, reputans eundem rectorem, cum non esset pro sue voluntatis libito, contumacem, prefatum episcopum Lauentinum in possessionem dicte ecclesie causa rei seruande contra iusticiam induceudum fore decreuit, in ipsius rectoris non modicum detrimentum, propter quod ex parte ipsius rectoris ad sedem apostolicam fuit appellatum. Quocirca discrecioni vestre de vtriusque partis procuratorum assensu per apostolica scripta mandamus, quatenus apud Judenburgam Salczpurgensis dyocesis, vocatis qui fuerint euocandi et auditis hinc inde prepositis, quod canonicum fuerit appellacione postposita decernatis, facientes quod decreueritis auctoritate nostra firmiter obseruari. Testes autem qui fuerint nominati, si se gracia, odio uel timore subtraxerint, per censuram ecclesiasticam appellacione cessante cogatis veritati testimonium perhibere. Quod si non omnes hiis exsequendis poteritis interesse, duo vestrum ea nichilominus exsequantur. Datum Anagnie, decimo kal. Junii, pontificatus nostri anno quinto.

Source Fulltext: ZAHN, Codex Diplomaticus (=FRA II/31, Wien 1870) S. 467-468