Bonifacius episcopus seruus seruorum dei. Dilectis filiis . . . abbati monasterii in Seydeinsteten et . . . . preposito ecclesie sancti Virgilii in Frisaco ac . . . . plebano plebis in Judenburga Salczburgensis et Pattauiensis diocesium salutem et apostolicam benedictionem. Sua nobis Hugo rector ecclesie sancti Petri prope Welcz Salczpurgensis dyocesis peticione monstrauit, quod cum venerabilis frater noster . . . Lauentinus episcopus, falso asserens predictam ecclesiam sancti Petri ad mensam suam episcopalem spectare et quod idem Hugo super eadem ecclesia iniuriabatur eidem, ipsum super hoc coram venerabili fratre nostro Chun. archiepiscopo Salczpurgensi auctoritate ordinaria traxisset in causam, predictus Hugo ab . . . archidyacono Gurcensi cui predictus archiepiscopus huiusmodi causam audiendam commiserat et fine debito terminandam, senciens indebite grauari ex eo quod idem archydiaconus procuratorem suum legitimum mandatum pro eo sufficiens exhibentem ad presenciam dicte cause admittere contra iusticiam recusauit humiliter requisitus, quamuis nulla subesset causa rationabilis propter quam idem rector deberet personaliter conparere, ad sedem apostolicam appellauit. Quocirca discrecioni vestre de vtriusque partis procuratorum assensu per apostolica scripta mandamus, quatinus apud Judenburgam Saltzpurgensis dyocesis, vocatis qui fuerint euocandi et auditis hinc inde propositis quod canonicum fuerit appellacione postposita decernatis, facientes quod decreueritis auctoritate nostra firmiter obseruari. Testes autem qui fuerint nominati, si se gratia odio ueltimore subtraxerint, per censuram ecclesiasticam appellacione cessante cogatis veritati testimonium peribere. Quod si non omnes hiis exsequendis poteritis interesse, duo vestrum ea nichilominus exsequantur. Datum Anagnie, decimo kalend. Junii, pontificatus nostri anno quinto.

Source Fulltext: ZAHN, Codex Diplomaticus (=FRA II/31, Wien 1870) S. 468-469