Ich Otto von Montpareys vergich allen den die disen brief ansehent oder hoerent lesen, daz ich durch pet meines getriwen diener Nicolaus des Rebtzen von dem Lu^oge vnd im zehelfe dem selben Raebtzen erlaubt han ze uerchauffen siben hu^oben dacz dem Lu^oge, die er von mir ze lehen gehabt hat vnd ich der manscheft der selben hu^oben mit andern lehen ze lehen gich vnd gehabt han von meinem lieben herren dem ersamen bischof Emchen von Frisingen vnd von seinem goteshause. Dar vber hat der saelbe Raebtz der vorgeschriben siben hu^obe mit samt dem Lu^oge an worden vnd uerchauffet mit meinem guten willen dem vorgenanten meinem herren dem bischof von Frisingen vnd seinem goteshuse mit allem dem daz dar zu gehoert, ze uelde vnd ze dorfe, besu^ocht vnd vnbesu^ocht. Da von han ich nach des saelben Raebtzen bet die manschaft der vorgeschriben siben hu^oben auf gegeben in des oftegenanten meines herren bischof Emchen hant vnd verzeich mich alles des rehtes daz ich nach lehens reht dar an gehabt han oder mochte gehaben, vnd vergich auch wol daz die saelben siben hu^obe als si der Raebtz uerchauffet hat, gen niemen mit meiner hant verchvmbert sint mit chaevffe, mit gemaehte, mit satzzunge oder mit deheiner slaht gedinge. Daz auch dar an dehein zeweiuel oder dehein chriech fuerbaz mvege aufgesten, gib ich disen offen brief versigelten mit meinem insigel ze, einem vrchvende dar veber mit den geziugen die hernach geschriben sint, die sint mein herre graf Emch probst ze Werdse, her Chv^onrat von Lok burgraf, her Chv^onrat von Puetelpach hofmaister meins vorgenanten herren von Frisingen, her Heinrieh der hofschriber vnd Johan sehriber ze Lok, Ulrich der Chropf vnd Vlrich sein svn, Perchtolde der Gleinacher mein diener, Albreht Osrek chelner ze Lok vnd ander piderb laevte. Der brief ist gegebn ze Lok da von Christes gebvert waren zwelf hundert iar vnd in dem zehen vnd nevnzigistem iar, des naehsten Pfintztages vor sant Veites tage.

Source Fulltext: ZAHN, Codex Diplomaticus (=FRA II/35, Wien 1871) S. 4-5