Nos frater W^oluingus miseracione diuina ecclesie Lauentine episcopus pro nobis et ecclesia nostra et ego Alhardus canonicus sancti Andree Frisinge. procurator venerabilis domini Hugonis rectoris ecclesie sancti Petri prope Welz, consenciente et volente reuerendo in Christo patre et domino meo Emchone venerabili episcopo ecclesie Frisingensis pro ipso domino meo Hugone presentibus profitemur et constare uolumus uniuersis ad quos peruenerit presens scriptum, quod nos dissensionis materiam iam diu inter nos Wlvingum episcopum ecclesie memorate ex parte una et dominum meum Hugonem super ante dicta ecclesia sancti Petri subortam ex altera pro bono pacis et concordie cupientes penitus amputare honorabiles uiros dominum Helmwicum canonicum et magistrum discipline ecclesie Salzburgensis et magistrum Gerlacum reuerendi in Christo patris et domini nostri Chunradi venerabilis archiepiscopi ecclesie Salzburgensis prothonotarium pro nobis Wlvingo et discretos viros magistrum Gotfridum archydyaconum et Bertholdum de Geboltspach canonicos ecclesie Frisingensis pro domino meo Hugone antedicto tamquam arbitratores sev amicabiles compositores elegimus uoto unanimi in hunc modum, videlicet quod predicti quatuor sub optestatione diuini iudicii dominum habentes pre oculis et uia equitatis in omnibus obseruata de plano et sine strepitu iudiciorum de meritis cause vtriusque partis siue de iure communi, priuilegiis, prescripcionibus re iudicata modo agendi in quocunque iudicio omnibusque aliis processibus, munimentis ac aliis amminiculis quibuscunque per que poterit animus eorum informari, cognoscant, diffiniant et decidant apud Mv^oldorf infra festum beati Johannis baptiste proximo affuturum, nisi forsan negocii qualitas terminum exigat ampliorem, cuius siquidem termini prorogacionem siue prorogaciones predicti quatuor moderari poterunt prout ipsis uisum fuerit expedire. In super si aliquis articulus siue articuli dubitabilis sev dubitabiles forsitan contingeret suboriri, ex tunc sine iuris iniuria predicti quatuor sine dolo et capcione qualibet assumere habent quintum et ad quancumque partem idem quintus uel plures ex ipsis declinauerint, dictum eorundem quasi pro sentencia inuiolabiliter obseruetur. Quod si forsan omnes predicti cum assumpta sibi persona quinta non possent aut nollent concordare, ex tunc ipsa dubitabilia sub expensis communibus ad doctores Paduanos siue Bononienses per nuncium uel per nuncios legacionis deferantur quorum doctorum dicta ab vtraque parte quasi pro sentencia teneantur. Adiectum est insuper quod quecunque parcium in sua causa succubuerit, alteri parti ad interesse et ad expensas legittimas teneatur. Preterea si aliquem siue aliquos inter predictos quatuor contingeret casualiter inpediri, quod non posset uel possent in ipso loco et ipsius cause cognicioni siue decisioni comode interesse, vtraque pars nostrum habebit loco absentis siue absencium alium uel alios subrogare, similiter et isti quatuor si quintum post denominacionem factam contingeret inpediri, habebunt alium substituere uice sui. Gaudebit insuper dominus Hugo sepe dictus nomine ecclesie Frisingensis plena et pacifica possessione in ecclesia sancti Petri in omnibus iuribus que ipsi domino Hugoni ante litem motam fuerant obseruata, iure tamen nostro fratris Wlvingi episcopi Lauentini in omnibus obseruato, donec ut premissum est, causa per ante dictos quatuor siue quintum ipsis coadiunctum aut per doctorum declaracionem siue interpretacionem finaliter terminetur. In quorum euidens testimonium presentes litteras nos Wlvingus nomine nostro et ecclesie nostre et nos Emcho ad peticionem Alhardi predicti nomine Hugonis sigillorum nostrorum munimine roboramus. Actum et datum in Oberwelz; anno domini M. CCC. II., kalendis Aprilis.

Source Fulltext: ZAHN, Codex Diplomaticus (=FRA II/35, Wien 1871) S. 17-19