Wir Fridrich von gotes gnaden herzoge von Osterreiche vnd von Steyre, herre ze Chrayen, avf der Marche vnd ze Portenawe tvn chvnt allen den die disen prief lesent oder horent lesen die nv lebend vnd hernach chvnftich sint, das Lebman der Jvde vnd sein havsvrowe vnd seine chint mit vnserm gvten willen vnd gvnst vnd auch mit vnser hant vnd mit vnsers getriwen diener willen vnd. gvnst Chalhohes von Eberstorf verchavft habent die zehenten da ze Pilihdorf, da ze Wentlingen vnd da ze Perwolfdorf, paide grozze vnd chlaine, die lehen sint von vnserm herren pischolfe Wernharten von Pazzawe vnd den zehenten da ze Raeheleinstorf paide, grozzen vnd chlainen, der lehen von vns ist vnd die in verstanden waren von dem vorgenanten Chalhohen, die selben zehenten habent sie verchavft vnserm getriwen diener Rvdolfen von Eberstorf des vorgenanten Chalhohes svn vmb drev hvndert phvnt Wienner pfenninge der sie reht vnd redlichen gewert sint, vnd habent avch vns der vorgesprochen Chalhoh von Eberstorf vnd Lebman der Jvde vnd sein havsvrowe vnd seine chint den vorgenanten zehenten da ze Raeheleinsdorf paide, grozzen vnd chlainen, ledichlichen vnd vreilichen vnd vmbetwngenlichen avf gigeben (!) also beschaidenlichen vnserm diener Rvdolfen von Eberstorf vnd seinen erben ze rehtem lehen mit allem dem reht als man lehen leihen sol, ledichlichen vnd vreilichen ze haben vnd allen iren frvmen da mit ze schaffen, verchavffen, versetzzen vnd geben swem siewellen, an allen irresal vnd sein avch wir herzoge Fridrich des vorgesprochen zehenten da ze Raeheleinstorf vnsers diener Rvdolfes von Eberstorf vnd seiner erben rehter gewer vnd scherm fvr alle ansprache als lehens reht ist vnd des landes reht ze Osterreiche. Vnd wand diser chavf vnd dise lehenschaft reht vnd redlichen vor vns vnd avch mit vnser hant geschehen ist, da von so haben wir geben vnserm diener Rvdolfen von Ebersdorf vnd seinen erben disen prief ze ainem sihtigen vrchvnde vnd ze ainem offen gezevge vnd ze ainer ewigen vestnvnge diser sache versigilten mit vnserm insigil. Diser prief ist geben ze Wienne do von Christes gebvrt waren ergangen drevzehen hvndert iar, in dem sibenten iare, dar nah naehisten Svntages nah Vnser vrowen tage der Lichtmesse.

Source Fulltext: ZAHN, Codex Diplomaticus (=FRA II/35, Wien 1871) S. 32-33