Ich Vlreich Meinhartes svn von Hohenawe vergihe an disem brief, daz mein genaediger herre her Emch der ersam bischof von Freising mir ze rechtem lehen verlihen hat daz gu^ot ze Hohenawe daz Perenger von Hohenawe weilent ze lehen het von dem gotshaus ze Freising, vnd han auch ich meinem vorgenanten herren dem bischof fur mich vnd fur meinen pru^oder gelobt vnd gehaizzen bei meinen trewen an aines aydes stat, daz weder ich, noch mein pru^oder ab dem selben gu^ot nicht nemen sulen, die weil fraw Tay\en Perengers tochter von Hohenawe lebt, wan dev selbe fraw Tay\en dev sol daz selbe gu^ot haben vnd niezzen an alle wider rede vncz an ier tot, vnd swenne dev selbe fraw Tayen stirbet, da nach sol ich vnd mein pru^oder vns des selben gu^otes vnder winnden vnd sollen ez denne ze lehen haben. Vnd daz dev rede also staet beleibe, dar vmbe han ich disen prief gegeben ze ainern vrchvnd vnd ze ainer gehvgenvsse vnd han auch meinen oehaim graven Goergen von Gu^otenberch gepeten, daz er sein insigel an disen brief gehenget hat, wan ich selbe ze der zeit aigen insigel nicht het. Ich Geori von Gu^otenberch vergihe auch an disem brief, daz ich nah des vorgenanten Vlreichs pet mein insigel an disen brief gehenget han vnd pin auch selbe pei den taeidingen gewesen vnd sint auch da pei gewesen mein herre graf Gerhart der tu^ombrost ze Freising, her Berchtolt von Gewolspach brobst ze Inichingen, her Wolfhart von Roehling chorherre ze Freising vnd meins herren des bischofs zwen chapplan her Berchtolt vnd her Berchtolt, vnd her Chv^onrat von Lok ab dem Turen vnd Berchtolt von Roehling vnd ander erber laevt genveg. Der brief ist gegeben ze Lok da man zalt von Christes gepurte drevtzehen hvndert jar, dar nah in dem sibentem jar, an dem Eritag vor sand Peters tag.

Source Fulltext: ZAHN, Codex Diplomaticus (=FRA II/35, Wien 1871) S. 39-40