Ich Chalhoh von Eberstorf chamrer in Osterreiche vergihe vnd tvn chvnt allen den die disen prief lesent oder horent lesen, daz ich mit meiner erben gvtem willen vnd gvnst vnd mit meins herren hant herzogen Fridriches von Osterreiche meins rechten lehens des ich von im han, drittehalp lehen die da ligent da ze Raeheleinstorf mit alle dev vnd dar zv gehorent, ze velde vnd ze dorf, swie so daz genant ist, die da dienent aller iaerchlich fivnf mvtte waittzes vnd drittehalp phvnt Wienner phenninge, die selben drittehalp lehen mit nvttze, mit al han ich gesatz (!) Lebmanne dem Jvden vnd seinen erben fvr fivnfzich phvnt Wienner phenninge da von dem hivtigen tage avf fivnfzehen phvnt phenninge gesvch get, avf ain ieglich phvnt sechs phenninge alle wochen. So svln sie die fivnf mvtte waitzzes vnd die drittehalp phvnt phenninge die die vorgenanten drittehalp lehen da ze Raeheleinstorf dient alle jar, nemen alle jar zv gesvche von den fivnf vnd den dreizzich phvnden phenninge vnd dehainen andern gesvch mer. Vnd ist daz ich so lange lazze gesvch avf die drittehalbe lehen gen daz sie niht tivrer ensint, so sol Lebman der Jvde vnd sein erben fvrbaz mit den vorgenanten drittehalbem (!) lehen da ze Raeheleinstorf allen irn frvmen schaffen als iz in wol chome vnd fvege, also verre daz sie paide havpgvtes vnd schaden gar da von gewert werden, vnd swaz in paide havpgvtes vnd schaden an den drittehalben lehen abe get, daz svln sie haben avf mir vnd avf anderm meinem gvte daz ich han in dem lande ze Osterreiche, vnd bin avch ich Chalhoh der vorgesprochen drittehalber lehen da ze Raeheleinstorf vnd alles des dar zv gehoret, Lebmannes des Jvden vnd seiner erben rehter gewer vnd scherm fvr alle ansprache als satzzunge reht ist vnd des landes reht ze Osterreiche, vnd gib in dar vber disen prief zv ainem vrchvnde vnd zv ainem gezevge mit meinem insigil versigilten. Diser prief ist geben ze Wienne do von Christes gebvrt waren ergangen drevzehen hvndert jar in dem achten jare, dar nah an sand Jorgen tage.

Source Fulltext: ZAHN, Codex Diplomaticus (=FRA II/35, Wien 1871) S. 50-51