Wir Hainreich vnd Weigant bru^oder von Maessenberch veriehen an disen brief vnd tv^on chvnt allen den di in sehent oder hoerent lesen, daz wir vns aller der ansprach vnd rehte di wir wanten oder mochten haben an den hu^oben vnd auf alle dem daz dar zv^o gehoert, besu^oht vnd vnbesu^oht, di in dem Weinperg vnd veberal swa si niden auf der Marih auf des gotshaus aigen von Freising gelegen sint, vnd di wir ze lehen iahen von vnserm herren bischof Emchen von Freising vnd von seinem gotshaus, verczigen haben vnd verczeihen gaenczlich vnd gar an disem brief fver vns vnd alle vnser erben vnd nahchomen also, daz wir vnd alle vnser erben vnd nahchomen fuerbaz dhain reht, noch dhein ansprache darauf gehaben muegen vnd dar vmb hat vns vnser vorgenanter herr bischof Emch von Freising von besundern gnaden gegeben vierzehen march loetiges silbers Wiennischs geloetes der wir gaentzlich vnd gar von im gewert sein. Dieser taiding sint zevg graf Gerhart der tu^ombrobst ze Freising, abbt Chvnrat von Weihensteven, maister Chvnrat chorherr ze Mosburch, her Ott der iung von Liechtenstayn, Chvnrat burchgraf ze Lok, her Fridreich von Muraw, Johans vnd Fridereich chorherrn von sand Andre ze Freising vnsers vorgenanten herrn bischof Emchen von Freising schreiber. Vnd dar veber ze ainem vrchvende haben wir vnserm herrn bischof Emchen vnd dem gotshaus ze Freising gegeben disen brief versigelten mit vnser baider insigeln, der ist geschriben ze Lok do man von Christes geburtt zalt drevzehenhundert iar dar nach in dem nevnten iar, des naehsten Svnntags vor sand Lavrencij tag.

Source Fulltext: ZAHN, Codex Diplomaticus (=FRA II/35, Wien 1871) S. 55-56