Wir Ru^od. von Schaerfenberch, Ot von Montparis, Wilhalm vnd Haevgel von Schaerfenberch veriehen offenleich vnd tv^on chvnt allen den die disen brif sehent oder hoernt lesen, di nv sint vnd her nah geborn werdent, daz wir mit gemainem rat vnd mit guetem vnd ganczm willen fver vns selb, fver alle venser erben die wir nv haben oder her nah gewinnen, vnd fver alle venser frevnt oder laevt vnde diener gar vnd gaenczleich verczigen haben vnd verzeihen an disem brif aller der ansprach; rehtes vnd aller der vorderung di vns vor gerihtes oder auzzerhalb gerihtes gevallent, ziment oder beholfen moehten sein, mit swelhen sachen oder ansprach daz waer, gegen v^onsern lieben vnd gnaedigem herren dem ersamen bischof Emchen von Freising, gegn sinen nahchomen oder hincz sinem gotshavs ze Freisingen vmb allen den schaden vnd gebresten den wir vnd alle vnser besvnder diener mit brant, mit ravb oder mit swelherlay sachen vnd beswarung vns der widervarn ist vnd enpfangen haben an venser laevt oder gu^ot, swie daz geschehen ist in allen den vrlevgn die wir gehabt haben in des vorgenanten vensers herren bischof Emchen von Freising vnd in seins gotshavs dieenst vnd rettung gegen den edln laevten Offen von Lantstrost, Ortolfen, Greiffen, Friczen vnd Hermann von Raevttenberch, Otten von Sicherstain vnd avch gegn Mainczen von Hopfenbach vnd seinen svenen vnd mit allen ir helfaern, swie si genant sint, swelherlay schad vns von den allen geschehen ist, dar avf verzeihen wir gar vnd gaenczleich, daz wir fuerbaz dhein ansprach svellen haben, noh dhain vorderung hincz venserm oftgenanten herren bischof Em. ze Frising vnd hincz sinem gotshavs, daz avch wir des vorgenanten schaden vnd aller ansprach dar vmb fuer vns, fuer venser erben vnd fuer venser diener verzeihen vnd verzigen haben. Ze ergeczung vensers schaden der avch vns gaenczleich genvegt, hat vnser vorgenanter herr bischof Emch mich Wilhalm von Schaerfenberch von sinen besvndern gnaden erledigt vmb dc march Agleyer pfenning von den vorgenanten Raevtenbergern di mich hetn in ir vanchnvezz vnd in ir banden, der selben losvng vnd ergeczung lazzen wir vns alle genvegen vnd verbinden vns an disem brif, daz wir, venser erben vnd vnser dienaer vmb alle venser vorgenant schaden dheinerlay rehtes, noh vorderung niht mer haben svellen hincz venserm oftgenanten herren den bischof vnd hincz seinem gotshavs ze Freysing. Waer avch, des got niht enwelle, daz venser dheiner oder venser frevnt vnd diener vmb den vorgenanten schaden dhein tat gegen venserm herren dem bischof oder gegen sinem gotshavs an griffen oder schaden taeten, des gebinden wir vns ganczlich vnd gar wider ze tv^on an allen avfschub, taeten wir des niht, so sol mit venserm gu^oten willen vnd avch mit vensrer bet der ersam herr graf Stephan von Steincznah vnd sein brueder des beholfen sein venserm herren dem bischof vnd sinem gotshavs gegen vns vnd gegen allen vensern helfern daz daz an schaden werd auz gerihtet, vnd sein avch wir des gebvnden an gevaerd wider ze tv^on vnd ze bezzern vnd sol er dez zv^o choemen mit venserm willen an vns vnd an venserm gu^ot, des svllen wir im niht vor sein. Vnd dar v^ober ze einem vrchvend vnd ze einer endlichen statichait venserr vorgenanten geluebd vnd verzeihung geben wir disen brif mit des vorgenanten edln herrn insigel graf Stephans von Steincznah mit aller vensrer vier insigeln als wir an disem brif oben genant sein vnd avch ze einer bezzern erchantnvezz mit vensrer frevnt insigeln F. von Chvengsperch, Seyfrides des Herwergers vnd Ber. des Frevdenbergers. Der brif ist geben ze Lok da man zalt von Christs geburtt drevzehenhvndert jar, dar nah in dem nevnten jar, des nahsten Mitichen nah vensrer Froven tach als si wart geborn.

Source Fulltext: ZAHN, Codex Diplomaticus (=FRA II/35, Wien 1871) S. 56-57