Ich Haertweich von dem Wasen vergih vnd tu^on chunt allen den die disen brief sehent oder hoerent lesen, daz mein lieber herre der ersam bischof Goetfrid von Frisingen von besundern genaden vnd niht von dheim reht gemacht vnd geantwu^ort hat miner hauzfrowen frown Christein dev lehen dev ich han von im vnd von dem gotshaus, also ob si mich veber lebt, daz si dev haben vnd niezzen sol biz an iren tod, vnd dar nah so wir baider nimmer sein, so geuallent dev selben lehen den bischof vnd daz gotzhaus an ze Frisingen an allen chriech vnd an alle wider red hern Otten mines brueder, siner erben vnd aller miner frevnt vnd andrer miner brueder, wan si mich ein an gehoerent vnd ich mit in getailt han auf gantz verzeihnvezz, vnd daz der selben lehen gehvegenvzz sei, benenn ich si an disem brief, des ersten ze Ludweigs Oede ein lehen, ze Tobersteten auf dem perig ein lehen, da selben auf dem Staincheller ein hof, da selben in dem Vreithof ein lehen, ze Waldmanstorf ein hu^ob, in dem Erlach ein lehen, an dem Aigen in der Zavche ein lehen, an der Hu^ob ein hu^ob, auf dem Hv^ongerperig ein hu^ob vnd auf dem Schoenpuhel zway lehen. Dev vorgenantn gu^ot sol mein hausfrowe haben ir lebtag, vnd naem si einen.andern wirt nah minen tod vnd gewuenn da bei erben, die suellen dhein reht haben auf dev offt genanten lehen, wan si dem gotshaus ledichleich nah vnser baider tod zv^o gehoerent. Vnd dar veber ze einem vrchvende gib ich disen offen brief versigelten mit minem insigel vnd ze einer zevchnvezz des erbaern herren insigel herm Wolfharts von Roehlingen des probstes ze Inchingen, der geben ist ze Vdmaruelt do man zalt von Christes geburt drevzehenhundert jar, dar nah in dem drevzehendem jar, an sant Georin tag.

Source Fulltext: ZAHN, Codex Diplomaticus (=FRA II/35, Wien 1871) S. 68-69