Icli Chv^onrat der Schilhaer vnd ich Lienhart des selben Schilhaers brv^oder veriehen offenleich an disem brief vnd tv^on chvnt allen den di in sehent oder hoerent lesen, daz wir vns mit vnserm leiben (!) herrn dem ersamen bischof Goetfriden von Frising gaentzleichen vnd gar verriht haben vmb allen den schaden vnd ansprach di wir gegen in vnd seinem gotshavs ze Frising gehabt haben vnd besvnderleich vmb ain hofstat dev da ze naehst bei der bverg ze Lok innerhalb der rinchmavr leit da daz Volchenhavs avf gestanden ist, vnd ob icht dar zv^o gehoert hat von paumgaerten oder von gaerten, waz wir dar avf rehtes oder ansprach gehaben moehten, da sei wir gaenzleich vnd gar von gestanden, daz wir dar avf fverbaz dhain ansprach svlen haben, vnd dar vmb geit vns vnser vorgenanter herr vierzich march alter Aglayer, der sol man vns auzrihten zwainczich march auf sand Marteins tach vnd der andern zwainczich march dar nach avf die Perchnahten die dar nach chvmftich werdent, vnd ich Lienhart verieh daz man der vorgenanten vierczich march meinem brv^oder Chv^onrat avz rihten sol vnd dar vber geb wir disen brief versiglten mit vnsers lieben vrevnts insigel herrn Chv^onrats von Lok vnd vnser beder insigeln, vnd der verrihtigvmb (!) sint zevg der vorgenant herr Chv^onrat von Lok, Jacob der Swan, Dietreich der Rennaer vnd Albreht der chelnaer. Daz ist geschehen da man zalt von Christes gebvrt drevzehenhvndert iar, dar nach in dem vierzehenten iar, des naehsten Mitichen nach sant Veits tach.

Source Fulltext: ZAHN, Codex Diplomaticus (=FRA II/35, Wien 1871) S. 75-76