Wir meister Dietrich von Wolfsawe probst ze Gurcz (!) vnd O. von Liehtenstein chamerer in Steyer schidlaeut vnsers herren des ersamen bischof Chunr. von Frisingen vnd wir Haertneid von Petawe vnd Fridr. von Leybencz schidlaeut an hern Rud. tail von Scherfenberch tv^on chunt allen den die disen brief sehent oder ho^erent lesen, daz wir von dem gewalt der vns von baiden tailen geben ist ze sprechen vnd ze schiden v^eber alle chrieg, vorderung, schaden vnd ansprach die zwischen dem vorgenanten bischof von Frisingen, sinen vordern vnd sinem gotshous einhalb vnd hern Ru^od. von Scharfenberch, sinen vordern vnd sinen erben anderhalb vnd ir baider laeuten vnd helfern auf gelaufen sint vncz auf hevtigen tag, sprechen vnd schiden mit rat vnsers herren des ersamen erczbischof Wich, von Salczburch vnd vnsrer herren bischof Hainr. von Gruk (!) vnd bischof Fridr. von Sekawe als her nah geschriben ist, ze dem ersten daz si baid gut frevnt sein vnd aller hazz genczleich ab sei zwischen in, iren helfern vnd dieneren, vnd sprechen auch daz her Ru^od. von Scherfenberch vnserm herren von Frisingen ledich lazze vnd ledichleich widerantwu^ert Gu^otenwerd vnd ander vrbor, laeut vnd gu^ot des er daz gotshous ze Frisingen enwert het, vnd aller schade der zwischen in baiden an laeuten oder an gut geschehen ist da selb oder anderswa, sol beidenthalb auch gehebt sein. Ez sol auch her Ru^od. von Scharfenberch vnserm herren von Frisingen ze eren vnd ze pezzerung mit saehzehen mannen in Chrayn vnd auf der Marih warten vnd dienen von hevt v^eber ein jar, ez si dann so (?) daz in ehaft not irre oder siner herren gebot von Salzburch oder von O^esterreich. So sol auch vnser herre von Frisingen herm Rud. von Scherfenberch, daz er den dienst dester baz volenden mv^eg, hundert march alter Greczzer pfenning geben, also ob der vorgenant vnser herre von Frisingen sinen dienst nemen wil, so sol er im der pfenning gebunden sein, waer aber daz er in des dienstes v^eberhaben wolt, daz sol im vnser herre von Frisingen von hevt in zwayn manoden chvnt tv^on, vnd geschiht daz, so sol her Ru^od. des dienst ledich sein vnd vnser herre von Frisingen der pfenning. Vnd daz diser spruch staet vnd vnzerbrochen beleib, habn wir vorgenant schidlaeut ze vrchu^ende vnsrev insigel an disen brief gehangen vnd dar zv^o vnsers herren des ersamen bischof Wich, von Salzburch vnd vnser herren bischof H. von Gruk vnd bischof Frid. von Sekawe habent auch irev insigel dar an gehangen, vnd wan wir bischof Chunr. von Frisingen vnd Rud. von Scherfenberch an die vorgenanten schidlaeut willichleich gegangen sein vnd vollen gewalt in ze sprechen vnd ze schiden gegeben haben v^eber alle vnser chrieg, schaden, vorderung vnd ansprach die zwischen vns bischof C. von Frisingen, vnsern vordern vnd vnserm gotshous vnd zwischen mir R. von Scherfenberch, minen vordern vnd erben vnd zwischen vnsrer baider laeuten, helfern vnd dieneren vntz auf heutigen tag gewesent sint, so loben wir bei vnsern triwen an aydes stat disen spruch staet vnd vnzerbrochen ze behalten an allen sinen articheln, vnd dar v^eber ze vrchv^end haben wir bischof C. von Frisingen, wan wir noh niht rehtes insigels haben, vnsrer bestatigung insigel. Vnd ich R. von Scherfenberch mein insigel an disen brief gehangen. Diser spurch (!) ist geschehen vnd diser brief geschriben ze Petaw (anno domini) millesimo CCC quintodecimo, feria tercia ante Kathedra Petri.¹

Source Fulltext: ZAHN, Codex Diplomaticus (=FRA II/35, Wien 1871) S. 76-78