Wir Ch. von gots gnaden bischof ze Frising veriehen mit disem brif, daz wir von Hertreichn von Hintterperg reht vnd redlich gechauft haben sinen hof ze Hintterperg den er von vns ze lehen hat, den selben hof haben wir von im gechauft, besvcht vnd vnbesvht mit alle dev daz dar zv^o gehoert ze dorf vnd ze veld, vmb zwelift pfvnt pfenning alter Wienner, also doh daz er den selbn hof pawen vnd inn haben sol vnd sol vns da von dienen alle iar an Vnsrer frowen tag in dem herbst ein pfunt pfenning Wienner, vnd ist also getaidingt, ob er den selben hof niht wider chavft oder sein svn von sand Giligen tach der newlich ist gewesn, inner drin iaren vmb dev vorgeschriben zwelf pfunt di er dar vmb enpfangen hat, so svllen wir im hin zv^o geben nah vier manne rat di gmain laevt sein, swaz vns im di geben haizzent, vnd sol danne der hof vnser vnd vensers gotshaus sein aigenlich vnd ewiglich an alle ansprach sein vnd siner erben. Dar veber geben wir, disen brif versigeltn mit venserm insigel der ist geben ze Vdmaruelt da man zalt von Christs geburt XIII hundert iar dar nah in dem XVI. jar, des Samcztages nah Vensrer frown tag in dem herbst.

Source Fulltext: ZAHN, Codex Diplomaticus (=FRA II/35, Wien 1871) S. 90