Wir Chunrat von gots genaden bischof ze Frising veriehen mit disem brief, daz wir ze vordrist durch got vnd vmb vnser sele haeil vnd von dehainen andern sachen noch rehten den nunnen ze Randek erchennen vnd gebn wellen ein almosen da bei si got fuer vns biten, vnd also schaffen wir vnd gehaizzen in ze gebn von vnserm chasten ze Vdmaruelt allev iar einen chaufmut roken vnd zwen chaufmut habern vnd drev pfunt pfenning, vnd habn in daz selbe almosen von besundern gnaden geschaffet ze gebn mit der auzgenomener rede, ob si an vns oder an vnsern nahchomen dehaeinerlaey vordrung haben wolten oder vns fuerbaz treiben oder mven mit ihtev, so sol dev vorgeschriben genade gaenczlich ab sein vnd wellen in fuerbaz nihtes schuldich sein. Si su^elln auch ir samenung mit dehainer frowen hinnefuer niht meren. Swenne auch ir einev ab stirbet oder mer nah der selben minnerung der frowen, sol man in der vorgeschriben pfruend so vil minner gebn. Vnd dar veber ze einem vrchuend gebn wir disen brief versigelten mit vnserm hangenden insigel, der gegebn ist ze Wienne do man zalt von Christes gebuert dreuczehnhvndert iar vnd da nach in dem sibenczehnden iar, des Maentags vor sant Laurencen tag.

Source Fulltext: ZAHN, Codex Diplomaticus (=FRA II/35, Wien 1871) S. 85-86