Wir Wolfhart vnd Albreht brueder von Fribreichsteten veriehen an disem brief, daz wir drev lehen ze Vdmaruelt dev wir ze lehen haben von vnserem gnaedigen herren dem ersamen bischof Chvnraten von Freising vnd da wir im purchreht von dienen, dev iaerchleich in seinen chasten suellen dienen vierczich meczen rokken vnd vierczich meczen habern, geseczet habn dem vorgnanten vnserm herren vmb zwelf pfunt Wienner pfenning, vmb drev mvtt rokken vnd vmb vier mutt habern Ostermazzes, vnd dev vorgenanten drev lehen sol er inne habn vnd niezzen biz wir oder vnser erben si von im loesen vmb die vorgeschriben pfenning vnd auch getraeyde vnd sol dev loesung geschehn auf sant Jacobs tach oder dar nach in aht tagen, vnd swenne wir oder vnser erben loesen auf die vorgesprochen frist, dannoch sol er den nucz von den lehen des selben iares haben vnd nemen. Vnd dar veber ze einem vrchuend, wan wir niht haben aeygenev insigel, haben wir disen brief mit hern Otten von dem Wasen vnd Hermans des Haesibs insigeln versigelt, der gegebn ist ze Vdmaruelt do man zalt von Christes geburt dreuczehn hvndert iar vnd dar nach in dem sehczehnden iar, des Freytags vor sant Margareten tach.

Source Fulltext: ZAHN, Codex Diplomaticus (=FRA II/35, Wien 1871) S. 84-85