Ich Rudolf von Liehtenstain vergih offenbar mit disem brief allen den die in sehent oder hoernt lesen, daz ich verchaufet vnd geantvrtt han meinem gnaedigen herren bischof Chu^onr. von Frising vnd seinem gotshous vmb sehczik vnd vier march loetiges silbers Wiennisch geloetes, der ich gar vnd gaentzlich gewert bin, zwo swaige ze Hinterek da Hans Perwolf vnd Petzman an dem Ofen auf sitzent, mit alle dev vnd dar zu^o geho^ert, ez sei holtz, wismat, erpaw^en vnd vnerpawn, besu^oht vnd vnbesu^oht, swie daz genant ist, in allen den rehten vnd nu^etzen, als ich ez inne gehabt vnd her braht han vnd ez ze rehtem lehen gehabt han von dem vorgenanten herren bischof Chv^onr. vnd von seinem gotshous ze Frising. Ich han auch die vorgenanten lehnschaft auf den selben gu^oten meinem vorgenanten herren bischof Chunr. vnd sinem gotshu^os auf gebn mit meines bru^oder hant hern Otten der die selben lehenschaft an vnser baider stat von im vnd von seinem gotshous enpfangen hat, vnd vertzeih mich fu^er mich vnd fu^er mein erben alles des rehten daz ich oder mein erben auf den selben gu^oten gehabt habn oder gehabn mohten, daz wir fu^erbaz dar nach dehain ansprach niht habn su^ellen. Daz das allez daz vor geschriben ist staet vnd vntzerbrochen beleibe, gib ich meinem vorgenanten herren bischof Chunr. vnd seinem gotshous disen gegenwertigen brief mit meinem anhangentem insigel. Der ist geschribn nach Christes gebvrt tausent iar, drev hundert iar vnd dar nach in dem sybentzehndem iar, des Pfinczetags nah Ostern.

Source Fulltext: ZAHN, Codex Diplomaticus (=FRA II/35, Wien 1871) S. 97-98