Ich Cheunegevnt (!) da ze Schintau Chv^onrates des Volen hausvrau vergih an disen prief und tv^on chvnt allen den die (disen) prief an saehent oder heorent lesen, daz ich meinem herren bischof Chv^o(n)raten von Vreisinggen han geseczet meinen zaeh(en)ten den ich von seinen genaden han da ze Perweinstorf auf dem hof den Chv^onrat der Vaerl besaezzen hat, daz mir Chv^onrat der amman da ze V^odmarvelt meines herren bischof Chvnrates phening hat auf den vorgenanten zaehenten gelihen sechs phvnt Wienner phenninge auf zwai jar vnd schol losvngge sein an Vnser vrauwen tac ze der Liehtmaesse vnd schol ich vor genantiv Cheunegeunt da ze Schintau Chv^onrates dez Volen hausvrau dienen von dem vorgenantem zaeh(en)ten die weil niht geleoset ist, alle jar siwenczaehen maeczen chornes vnd siwenczaehen maeczen haweren, vnd dien ich vor genantiv Cheunegeunt niht in meines herrem bischof Chvnrates chasten da ze V^odmar^velt den vor genanten getrait, chorn vnd haweren, so schol man phennigge auf den vor genanten zaehenten slahen ze der Liehtmaesse, so losengge ist, swie chorn vnd hawer danne in den chauffe ist vnd gant hawe, vnd leos ich vorgenantiv Cheunegevnt den vor genanten (zaehent) niht von Lieht maesse euwer zwai jar, so schol ich den saelwen zaehenten meinen herren pischof Chv^onraten an pieten, ist er pei dem lande, ist auer er pei dem lande niht, so schol ich vor genantiv Cheunegevnt den vorgenanten zaehenten meines herren bischofes Chv^onrates amptleut anpieten, geltent si mir den vorgenanten zaehenten, als zeitleich ist, so schol ich des saelwen zaehenten meinem herren bischof Chv^onrat paz gevnnen, danen anderen laeuten, ist auer dez saelwen niht, daz man mir sein niht gelten wil, so schol ich meinen zaehenten dem gaewen, der mir in aller pest gilt. Daz div red staet peleiwe, dez ist gezeuc mein herre von Schaffe(r)veld burchgraf da ze V^odmarvelt vnd Chv^onrat der chastener vnd Chv^onrat der amman da ze V^odmarvelt vnd ander erwer laeut die pei der red gewaesen sint. Daz div raed staet beleiwe vnd niht verchaered waerd, dar euwer giw ich vor genantiv Cheunegevnt meinen prief mit meines herren insigel von Schaffervelt wan ich saelwe dehain insigil han. Der prief ist gewen do von Chri^stes gebeurte waren tasen (!) iar, drivhvndert iar vnd in dem siwent zaehentem iar, des naehsten Svnnetages nach sant Erha(r)tes tac.

Source Fulltext: ZAHN, Codex Diplomaticus (=FRA II/35, Wien 1871) S. 96-97