Ich Oertolf der Cholbe vnd vrowe Margrete mein hausvrowe vnd alle vnser erben wir vergehen offenleich an disem prief allen den die in sehent oder hoerent lesen, die nu lewent oder hernach chuenftich sint, daz wir verchouffet haben den erberen vnd begewen vrowen hintze got der abtessinne vnd der samenungen allen gemein sande Claren orden dacz Judenburch ein huewen dacz Feuchstierch (!) oberhalwe Chetze da Fridel auf sitzet, vmb siben march silber der wir rechte vnd redeleich gewert sein. Daz selwe guet hawen wir in gegewen fuer rechtes aigen als wir ez her pracht hawen, in aigens gewer vnd daz selwe guet schulle wir den eebenanten vrowen schermen, wir vnd alle vnser erben, als aigens recht ist vnd auch dez landes recht ze Steir, vnd den selwen scherme schullen die vorgenanten vrowen hawen auf vns vnd auf allev dev vnd wir hawen. Wir hawen auch den eebenanten vrowen daz vorgenante guet dacz Feuchstirch gegeben mit allem dem nutze wir ez inne gehabt hawen, swie ez genant ist, vnd hawen auch den vorgenanten seligen vrowen daz gelobt pei vnsern treuwen an aides stat vnuerscheidenleichen, ob daz wer daz man sev an spreche vmb daz vorgenante aigen, swaz sev danne schaden nement den sev pei iren treuwen gesagen muegen, den selwen schaden schulle wir in ab legen an alle wider rede, daz lobe wir in pei vnsern treuwen auch an aides stat vnuerscheidenleichen. Vnd daz diser chauffe vnd diczer gelubde immer ewichleich stete von vns vnd von allen vnsern erben den erberen vorgenanten vrowen fuerpaz werde behalten, dar vber so gewen wir in disen prief mit heren Ruedolfs insigel von Liechtenstain vnd mit herren Herwotes insigel von Pfoeffendorf vnd mit mein selwes insigel. Dar vber sint dez gezeuge her Oertolf vnd Dietmar vnd Otte von Reiffenstein vnd Herman der richter von Judenburch, Hainreich der chramer, vnd Merchel der chramme vnd Nychlas der chuersner von Judenburch vnd ander erber leute genueche. Diser prief ist gegewen nach Christes gepuert tausent iar, drevhundert iar in dem neuntzehenden iar, an sande Peter vnd Pauls abent.

Source Fulltext: ZAHN, Codex Diplomaticus (=FRA II/35, Wien 1871) S. 109-110