Ich Seifrid von Welcz heren Offen sun von Winchleren vergich offenleich an disen prief vnd tuen chunt allen den die disen prief sehent oder hoerent lesen, daz ich mit guetem willen meinner hauswrauen wrauen Elspeten vnd aller meinner erben gunst vnd willen den erberm manne Artolfen dem Pruderlein purger ze Slednich vnd seiner hauswrauen Christein vnd ier payder erben verchauft han meinne swaige die ich ze lehen han von dem erberm gotshaus von Freising deu gelegen ist in dem Chrumpech pei Welcz da Wiertli auf gesezen waz, vnd daz reut der zue gehoert, vnd swaz zu der swaig vnd dem reut gehoert, haus vnd hof, alwen, wisen vnd holcz, gereut vnd vngereut, gepauen vnd vngepauen, geschuet vnd vngeschuet, mit allem dem recht als ich vnd mein vardern her pracht haben, vmb sechzch march silber loetiges vnd vm zehen ellen tuech von Eiper der ich gar vnd ganczleich mit rehtem gelo^et gewert pin, vnd schol ich vnd mein erben dem vorgenanten Artolfen dem Pruederlein vnd allen seinnen erben daz vorgenante guet schermen var aller ansprach als lehens recht ist in dem lant ze Steyer, vnd alle chrieg ze loesen. Taet ich dez niht swelhen schaden der vorgenante Artolf vnd sein erben da von nemen von dehainer ansprach, den schol ich vnd mein erben im vnd seinen erben ganczleich ab tuen vnd schol er vnd sein erben daz haben auf meinen treuen vnd auf alle deu daz ich vnd mein erben haben, swa daz gelegen sei. Auch lob ich daz, ob dez vorgenanten Artolfs Pruederleins nicht wer, des got nicht welle, so schol ich Chuenraten dem altem Sturer purger ze Slednich gepunten sein aller der gelub als oben geschriben ist. Daz im daz stet vnd vnzeprochen peleibe, dar vber gib ich disen prief versigelt mit ineim hangendem insigel zu vrchund der warhait. Dez sint gezeugen her Nicla pharrer ze sand Peter, her Herbot von Pfaffendorf, Herman sein prueder, Fritz von Teufenpach, Vlreich der Chnolle, Fritz der Lercher, Chu^entzel von Winchleren, Reycher von Scheder, Peter der Heller, Perthold der Stainhauser (vnd) ander erber leut genuech. Der prief ist geben nach Christes gepurt vber dreuzehen hundert iar, dar nach an dem neuntzehentem iar, daz Oberwelcz, des nesten Suntages vor Weinathen.

Source Fulltext: ZAHN, Codex Diplomaticus (=FRA II/35, Wien 1871) S. 117-118