In nomine domini nostri Jesu Christi amen. Nouerint vniuersi presens scriptum legentes, videntes aut ad quos peruenerit eius tenor, quod ego Chv^onradus dei miseracione Frisingensis episcopus dum ad presens extra terram Bawarie disponerem proficisci, intra cordis mei arcana verbum sapientis meditabar quo dicitur, Nichil certius morte et nil incertius hora mortis. Id circo pro salute anime mee et omnium michi attinencium vel ex sangwine aut fideli obsequio, cupiens quedam disponere de rebus mobilibus tempore amministracionis per sollicitudinis et industrie proprie vigilanciam conquisitis et vltra impensa vsque nunc pro comodo ecclesie michi credite in muralibus reformatis et de nouo construetis ac prediis comparatis et emptis, etiam comportatis et fideliter reseruatis iure testamenti et legatorum, vel secundum quod melius valere et subsistere potest, dono, ordino et statuo subscripta. Primo sciendum est quod apud Waidhoven in deposito habeo in camera mea octingenta et triginta sex marcas argenti puri Wiennensis ponderis cuius depositi sunt custodes Chvnradus iudex ibidem et Johannes granator, et in eadem camera similiter in deposito habeo sub predicta clausura octingenta libras Wiennensium veteres, de quo parata pecunia ordino et dono capitulo ecclesie mee kathedralis sexaginta marcas argenti Wiennensis ponderis pro prediis et redditibus comparandis qui in die anniuersarii obitue mei distribuantur inter canonicos presentes in officio defunctorum quod in vigiliis et missa pro me sollempniter fieri debet sicut in anniuersarus episcoporum fieri consweuit, et si ipsum capitulum aut singule persone eiusdem ad alios vsus quoscumque dictam pecuniam conuerterent, eo ipso ad meum cadat successorem. Item ordino et dono de predicta depositi pecunia eidem capitulo quadraginta marcas argenti Wiennensis ponderis pro prediis et redditibus comparandis qui distribuantur singulis Sabbatinis noctibus inter canonicos presentes qui inter Pascha et Pentecosten in processione fuerint ad capellam sancti Johannis Baptiste que Sabbato quolibet tunc et post vesperas fieri debet cum antiphona Regina celi letare, et collecta ad hoc pertinente, quam processionem de koro maiori ad capellam episcopalem a Pasca usque ad Pentecosten quolibet Sabbato statuo futuris temporibus obseruari. Item lego et ordino de eadem pecunia decem marcas argenti pro redditibus comparandis ad luminaria, et pannis sericeis necessariis ad exequias anniuersarii mei et pro solacio custodum et pulsancium, sicut fit in commemoracionibus episcoporum. Item de eadem pecunia siue deposito lego et ordino pro complemento operis capelle sancti Johannis quam erexi de nouo opere et in qua eligo sepeliri trecentas marcas argenti Wiennensis ponderis, et si vltra muralia et fenestra vitrea aliquid supererit, illud ad vsus reddituum canonicorum eiusdem capelle conuertatur. Item pro quatuor lvminaribus quatuor altarium eiusdem capelle lego et dono de prefato deposito quadraginta marcas puri. Item ad fabricam luminarium, fenestrarum et aliorum necessariorum eiusdem capelle dono et ordino sexaginta marcas Wiennensis ponderis de deposito supradicto cuius fabrice prouisor et director erit decanus capelle qui fuerit pro tempore, constitutus. Item dono et ordino de eadem pecunia ducentas marcas puri Wiennensis ponderis pro prediis et redditibus comparandis canonicis et preposito prelibate capelle sancti Johannis vltra ea que ipsa capella tenuit ab antiquo et de nouo sibi donata plebe in Erdingen. Item lego et ordino capitulo sancti Andree Frisinge viginti marcas argenti. Item ordino capitulo sancti Viti viginti marcas, item capitulo Mosburgensi viginti marcas Wiennensis ponderis pro prediis et redditibus comparandis vt meum anniuersarium per singulos annos peragant vigiliis et officio defunctorum, et hec expedicio fiat de deposito prelibato. Notandum quod apud Sifridum granatorem de Enzestorf habeo in deposito viginti marcas auri Wiennensis ponderis et plus quam centum marcas argenti. De his ordino tres marcas auri pro calice fiendo ad altare publicum beate virginis ecclesie maioris. Item ordino et dono duas marcas auri pro calice ad capellam sancti Johannis per me erectam. Item pro redditibus comparandis et prediis vltra predicta dono et ordino preposito et canonicis sancti Johannis quinque marcas auri eiusdem ponderis. Item de predicto auro ex humanitate et elemosina dono et ordino Dyemu^odi matri mee quinque marcas auri Wiennensis ponderis. Item Heilwigi martertere mee dono tres marcas auri eiusdem ponderis. Item Hainrico magistro camere duas marcas auri et decem marcas argenti de deposito proximo. Item de deposito denariorum apud Waidhouen ordino et statuo per subscriptos executores diuidi inter seruitores meos secundum merita et seruicium vniuscuiusque quadringentas libras Wiennensium veterum, nisi egomet subsequenter aliquibus certa et numerosa (?) legarem vel donarem quibus tunc de illa pecunia nichil est dandum, sed tantum eidem summe detrahendum. Cetera omnia siue sint in rebus mobilibus aut se mouentibus clenodiis; debitis officialium secundum eorum raciones et nouissimos recessus, sicut de hiis vbique habentur reuerse et calculi librorum, sint et pertineant ad successorem meum qui ad vsus ecclesie hec omnia conuertat dei misericordia adiuuante. Volo tamen et statuo, vt si aliqua de premissis, etiam maiorem partem eorum recupero vel successu temporis ad alios aut alium actum conuerto . . . (?) quicquid suprascriptum et ordinatum est, totum nichilominus de pecunia alia aut apud eosdem officiales remanente vel alios in Welcz, Lok aut alibi vbicumque in partibus singulis compleatur, et quod tunc erit vltra premissa superfluum, transeat ad successorem. Non eciam per hoc adimo michi potestatem quin presentem ordinacionem et partes eius possim successu temporis reuocare vel ei addere aut detrahere uel mutare, aut sicut occurrunt tempora, eam expressius declarare. Super hiis omnibus et singulis fideliter prosequendis ordino et constituo dilectos meos dominos Ottonem decanum, Emchonem de Alzeya et Henricum magistrum camere canonicos Frisingenses executores et impletores ad fidem et conscienciam ipsorum, ita quod si omnes simul vel noluerint aut non potuerint prosequi, duo ex eis nichilominus prosequantur, vnus vero non per se, nisi duo reliqui decederent ab hac vita. Facta est hec ordinacio et scripta manu mea propria anno domini millesimo trecentesimo decimo nono, VI. idus Nouembris. Item notandum quod ad presens estimo me habere in Welcz circa centum marcas argenti, item apud Lok circa sexcentas marcas Aquilegensium, item apud iudicem in Waidhouen circa centum marcas argenti et plus, item apud granatorem Johannem ibidem circa ducentas marcas argenti, item in omnibus granariis bladi et vini copiam habundantem.

Source Fulltext: ZAHN, Codex Diplomaticus (=FRA II/35, Wien 1871) S. 111-114