Ich Dietrich von Randekk, Wuelfings saeligen sun von Randekk, tun chunt vnd vergich offenleich an disem brief allen den (die) in sehent oder hoerent lesen, daz ich gelobt vnd verhaissen han vnd gesworen zden haligen (!) fuer mich vnd fuer all mein erben vnd all mein nach chomen die ich hie zu^o pind vnd verpunden han, meinem gnaedigem herren bischolf Chuenrat von Freysing vnd allen sein nach chomen vnd dem goczhaus ze Freysing als daz ze staet haben (!) vnd ze volfueren vnd zetuen mit dem haus vnd mit der purch ze Randekk dez sich mein vater saelig Wuelfing hat verpunden gegen meinem herren bischolf Emychen saeligen vnd allen sein nach chomen vnd gegen dem goczhaus ze Freysing, als sein brief stat vnd seit den er dar vmb geben hat meinem herren bischolf Emychen saeligen vnd seinen nach chomen vnd dem goczhaus ze Freysing, vnd bei namen, swenn mir oder chainem meinem erben daz haus vnd di purch ze Randekk vail wirt, so schullen wirs nieman ander verchauffen, noch ze chauffen geben vmb vrbar, noch vmb pfenning, dann meinem herren bischolf Chuenrat von Freysing oder seinen nach chomen swer dann bischolf ist, vnd dem goczhaus ze Freysing vnd nieman andrer, wan daz haus vnd di purch ze Randekk von im vnd von seinem goczhaus ze Freysing lehen ist. Swo ich oder chain mein erb icht anders taeten mit dem haus vnd mit der purch ze Randekk dez got nicht enwell, so ist di purch vnd daz haus ze Randekk meinem herren bischolf Chuenrat vnd seinen nach chomen, ob er nicht en ist, vnd dem goczhaus ze Freysing gar vnd gaenczleich veruallen, vnd ich vnd mein erben haben fuerbaz zdem haus vnd zder purch ze Randekk chain recht mer. Daz ich mich vnd all mein erben dez verpunden han dez hie vor geschriben stat an disem brief, als mein vater saelig auch tan hat, dar vmb hat mir mein herr bischolf Chuenrat von Freysing zehen pfunt alter Wienner geben der ich von im gewerd pin, zestevrr an meinem chauff dez haus vnd der purch ze Randekk di ich chauft han von meinem brueder Wuelfingen. Daz ist geschehen ze Waydhouen vnd ist da pei gwesen mein herr von Ende tuemprobst ze Freysing vnd chirchherre ze Waydhouen vnd mein herr von Alczay chorherr ze Freysing vnd her Dietrich meins herren bischolf Chuenrat chapplan vnd Anuelt meins herren bischolf Chuenrat marchschalch vnd Go^etfrid purchgraf ze Chuenraczhaim vnd Jacob der Speyser. Vnd zu einem woeren vrchund als daz vor geschriben stat, so han ich diesen brief geben versigelt meinem herren bischolf Chuenrat vnd allen seinen nach chomen vnd dem goczhaus ze Freysing mit meinem insigel. Dirr brief ist geben do man zalt von Christez gepurt dreuczehenhundert iar, dar nach in dem nevnczehendem iar, an sand Nyclaus tag.

Source Fulltext: ZAHN, Codex Diplomaticus (=FRA II/35, Wien 1871) S. 114-115