Ich Fridreich Fribesteter vergich an disem brief, daz ich meinem genaedign herren bischof Chvnraden von Freisingen verchauft han reht vnd redleich meinen hof ze Prantsteten den ich von im ze lehen han gehabt vnd der iaerleich dienet zwain phunt phening, eins an Vnsern vrowen tag in dem herbst vnd daz ander an sand Marteins tag, also daz er, sein nachchomen vnd daz gotshaus ze Freisingen den selben hof mit alle daz dar zue gehoert, besueht vnd vnbesueht, levt vnd guet inne haben vnd ewichleich als ander aygen v^orbor niezzen schullen mit dienst, mit stewer vnd mit allen sachen, vnd schol ich vnd mein erben mit dem hof fuerbaz, noch mit levten, noch mit guet vnd swaz dar zue gehoert, nichtsniht ze schaffen haben vnd verzeich mich dar auf fuer mich vnd fuer alle mein erben. Den vorgenanten hof vnd swaz dar zue gehoert han ich meinem herren vnd dem gotshaus ze Freisingen gaentzleich vnd ledichleich geben vnd verchauft vinb zwainzich phunt Wienner phening vnd vmb syben mvtt getraides, drey roken vnd vier habern, der selben phenning vnd getraydes bin ich gaentzleich gewert, vnd auch vmb ein vaz weins daz ich dar vmb auch enphangen han. Vnd wan ich aygens insigels niht enhan, gib ich disen brief versigelten mit meiner vreunt insigeln Hermans dez Haesibs vnd Volchmars von Hag dar vnder ich mich vnd mein erben verbinde der vorgeschriben sache. Daz ist auch geschehen vnd ist der brief geben ze Vdmaruelt, da man zalt von Christs gebuerd drevzehen hvndert jare, dar nach in dem zwaintzgisten jar, dez naegstem (!) Samztags nach der Osterwochen.

Source Fulltext: ZAHN, Codex Diplomaticus (=FRA II/35, Wien 1871) S. 122-123