In nomine domini amen. Nos Symon diuina permissione abbas in Weyhensteuen, Heinricus prepositus Nouecelle et Chu^onradus prepositus in V^ondestorf dyocesis Frisingensis, ad vniuersorum noticiam quorum interest, deducimus per presentes, quod anno domini millesimo CCC. XX., tercia feria post octauam Epiphanie, nobis conuenientibus et existentibus in castro episcopali Frisinge, fuit lecta infrascripti tenoris cum pendenti sigillo littera in sui prima figura et consistencia coram nobis: Folgt nun Urkunde ddo. 1319, 16. Dec., Bruck a/ M. (Nr. 535).Quo facto eodem contextu sev continuacione temporis reuerendus in Christo pater dominus noster Chu^onradus venerabilis episcopus Frisingensis talem protestacionem et consequenter appellacionem coram nobis proposuit per omnia in hec verba:||
Coram vobis honorabilibus viris domino Symone abbate in Wihensteuen, Heinrico preposito Nouecelle et Chu^onrado preposito in V^ondestorf et pluribus aliis ad hoc specialiter vocatis et rogatis tanquam coram bonis et viris ydoneis nos Chu^onradus episcopus Frisingensis pro nobis et ecclesia nostra dicimus et proponimus expresse, protestantes quod eadem dicturi et facturi essemus coram venerando viro domino O. abbate monasterii sancti Lamberti ordinis sancti Benedicti Salczburgensis dyocesis, si sui copiam habere possimus, qui se vnacum aliis collegis scribit et nominat executorem deputatum de gracia facta uel fienda discreto viro domino Friderico Gloyacher Colocensis et Frisacensis ecclesiarum canonico super beneficio curato uel non curato quod ad collacionem sev aliam disposicionem noscitur pertinere. Et primo dicimus et eciam protestamur, quod eundem Fridericum Gloyacher nunquam impediuimus, nec deinceps indebite intendimus impedire, nec impedientem scimus, scilicet (ad) ecclesiam in Lok que sub anno domini M. CCC. XIX. in die beati Francisci vacare cepit, nostro vtentes iure debito tempore honorabilem virum dominum Emchonem de Altzeya ad eam presentauimus qui per patriarcham Aquilegensem loci ordinarium sollempni more extitit institutus, ita quod de acceptacione dicti F. eramus prorsus inscii sev ignari donec post aliquos menses elapsos tandem Sabbato in octaua Epiphanie domini nobis de sua acceptacione innotuit vt supra inserte littere manifestius pandit tenor. Secundo in eo quod nos grauat memoratus dominus Albertus et grauare intendit grauaminibus hic subscriptis et presertim in eo quod cum sit datus vna cum aliis executor, certum est sine aliis tanquam solus hoc explicando habet nullatenus potestatem, nec obstat quod postmodum in tenore . . . . est subiunctum quod nos uel alter etcet. quia sub condicionis euentu ipsis a prineipio pro indiuiso tradita est potestas . . . . donec se prius requirant uel consulant an velint uel nolint college, constat quod antea non est consolidata in vnum potestas et exercicium efficaciter exequendi, et sic factum et preceptum in eo quod quod alias iure et iuste facere possumus et debemus, nos non artat. Item tercio quod in sententia sev precepto, scilicet quod infra sex dies qui dies a Sabbato Epiphanie numerandi forent, eundem Frid. Gloyacher in possessionem debeamus recipere et admittere et turbato res remouere etc., tanquam in hac parte iniungens et implicans facto, impossibile nos non vrget, maxime propter nimis inconpetens termini sev temporis interuallum et huius rei euidencia se ipsam ostendit, cum inter Frisingam vbi nunc degemus, et locum vbi id fieri precipitur, plus sit quam distancia quatuordecim legalium dietarum et ipse tantum prestiterit terminum sex dierum. Ex hiis uel eorum altero patenter et notorie sencientes nos et ecclesiam nostram irracionabiliter pregrauari et grauatos esse ac in futurum ab ipso grauari posse, coram vobis tanquam si coram ipso essemus presentialiter constituti, ad cautelam in hiis scriptis ad sedem apostolicam appellamus subicientes nos, statum, honores, res et iura et beneficia nostra protectioni sedis eiusdem et apostolos petimus iterum et iterum petimus cum instancia nobis dari et super appellacione huiusmodi vestrum testimonium inuocamus, astringentes nos tantum ad ea que sufficienter appellacionem nostram verificant siue firmant. Protestamus quoque et promittimus quod presentem appellacionem eidem venerando viro domino O. abbati sancti Lamberti insinuabimus, notificabimus ac ipsam ex hiis et aliis illatis et inferendis grauaminibus innouabimus coram ipso aut aliis sicut fuerit oportunum. In premissorum autem euidenciam et cautelam testimonii presentes nostrorum sigillorum signaculis consignamus. Et nos Chu^onradus episcopus Frisingensis ob amplius per nos sic interposite appellacionis iudicium, nostrum sigillum appendimus, in id ipsum protestantes cum hoc quod per vim appellacionis per nos facte non intendimus preceptum sev ipsius virtutem facere aliquam que est nulla. Actum et datum Frisinge, anno domini millesimo trecentesimo vicesimo, XVIII. kalendas Februarii.

Source Fulltext: ZAHN, Codex Diplomaticus (=FRA II/35, Wien 1871) S. 119-121