Allen den die disen brief ansehent oder hoernt lesen, chvnde ich Lu^odweich von Zelging herren Lu^odweichs saligen sun von Zelging vnd vergich offenliech an disem brief fvr mich vnd fur meinen bru^oder herren Heinreich chirchherren (!) ze sand Laurentzen vnd fur alle mein erben, daz ich meinem herren byschof Chv^onraden von Friesingen vnd seim gotshaus ze Frisingen han verchauft vnd ze chaufen geben recht vnd redlaich den anger vnd die wis die mein vater salig her Ludweich chauft von Wolfharten dem Rietmocher, besu^ocht vnd vnbesu^ocht, mit allen rechten swas von alter dar zv^o gehoert hat, vmb an ains dreizich pfunt alter Wienner phenning der selben phenning ich vnd her Heinreich mein bru^oder von im vnd von seinem gotshaus ze Frisingen gar vnd gantzlich sein gewert. Ich vnd mein erben sullen dez angers vnd der wis sein vnd seines gotshaus ze Frisingen recht gewer vnd schirmer sein, swo er sein oder sein gotshaus bedarf vnd notturftich ist, nach dez landez ze Oesteriech recht vnd gewonhait vnd verzaeich mich an dem anger vnd an der wis fuer mich, vnd fur meinen bru^oder herren Heinreichen chircherren ze sand Laurenczen vnd fur alle mein erben aller der rechte so wir heten vnd gehaben mochten an dem vorgenanten anger vnd an der wis, vnd ze ainem worn (!) vrchvnde han ich im vnd seim gotshaus ze Frising disen brief (geben) versigelt mit meinem insigel. Dirr brief ist geben ze Waydhouen do man zalt von Christes geburte dreuczehen hvndert jar, dar nach in dem drei vnd dreizzigistem iar, dez nachsten Phincztags in der Phingsten.

Source Fulltext: ZAHN, Codex Diplomaticus (=FRA II/35, Wien 1871) S. 204-205