Allen den die disen brief an sehent, lesent alder ho^erent lesen, kvnd ich Chu^onrat der Yesentzer vnt vergih offenlich mit disem brief, das ich han verkauft vnd ze kaufen gegeben mayn (!) lehen das da layt ze Paitenstain vnd ze naehst an die purg ze Paytenstain stosset, mit allen den rehten so dar zu^o gehoert vnd von alter der (!) zu^o gehoert hat, besu^ocht vnd vnbesu^ocht, mit der mul vnd mit den gerautern, mit holtz, mit velt vnt mit wismat, das lehen mayn reht aygen ist, vnd swas dar zu^o gehoert han ich verkauft vnt ze kaufen ge geben dem e wirdigen (!) herren byschof Chu^onrat ze Fraysingen vnd seinem gotshaus vmb vier vnd sehtzig phunt alter Wiener phennig vnd bin auch der selben vier vnt sehtzig phunt von im vnd saynem gotzhaus gar vnt gaentzlaich beriht vnd gewert. Daz selb lehen vnd swas dar zu^o gehoert, han ich dem vorgenanten herren byschof Cu^onrat von Fraysingen vnd saynem goczhaus fur aigen verkauft vnd ze kaufen gegeben vnt schol sain auch fur aygen wer sayn vnd schol ims vnd saynem gotzhaus schirmen swa er sin alder sain gotzhaus bedarf, nach des landes ze Oesterrich reht, ich vnd alle mayn erben, won (!) das selb lehen vnd swas dar zu^o gehoert, main svnderbar vnd allain ist vnd hant min pru^oder damit niht ze schaffen, vnd ward mir ze tail do ich vnd mayn pru^oder mit ain ander taillent, vnd gab vns das selb lehen her Alram von Raycherstorf vmb ain ander gu^ot. Vnt ze ainem offen vrkvnd aller der ding so da vor geschriben st(an)t, han ich dem vorgenanten byschof Chu^onrat ze Fraysingen vnd saynem gotzhaus disen brief (geben) versigelt mit minem insigel. Pay disem kauf ist gewesen her Margwart von Luehsneg, Pernhart mein pru^oder ze den zayten rihter ze Amsteten, Chu^onrat Pu^och ze den zaiten purgraf ze Chu^onratzhain (!) vnt Herman Haesib von Vdmeruelt. Dirre brief ist gegeben ze Waydhouen do von Christes gepurt ergangen warent drutzehen hvndert jar, dar nach in dem dru vnd trisgosten jar, an dem naehsten Maentag nach sant Johans tag ze Svnwenden dem (!) man sprich (!) der taufers.

Source Fulltext: ZAHN, Codex Diplomaticus (=FRA II/35, Wien 1871) S. 205-206