Ich Wulfing von Mitterdorf herren Chu^onraten saligen sun von Winchlern tv^on chunt vnd vergich offenlich an disem brief fuer mich vnd fuer all mein erben, das ich meinem herren byschof Chunrat ze Frising vnd seinem goczhaus han gelobt vnd verhaizzen, daz ich im vnd seinem goczhaus ze Frising Chu^onrat meinem bru^oder den Welczer sol ab nemen vmb das holtz das im mein herr byschof Chunrat hiez howen vnd sein leut hiez ab slohen in dem Chrumbech, vmb daz selbe holcz sol ich meinen herren byschof Chunrat vnd sein gotshaus vertreten vnd gaentzlich ablegen gen meinem bru^oder Chu^onrat, swo ich dez niht entven, swelhen schaden mein herr von Frising ald sein gotshaus enphahent ald nement, swie si dez ze schaden choment, den schaden sol ich vnd mein erben meinem herren byschof Chu^onrat vnd seinem gotshaus ze Frising ab legen vnd vnschadhaft mochen gar vnd gaentzleich, an allen fuerczog vnd widerrede vnd an all chlag vnd an allev gricht. Ich han mich ouch verzigen fur mich vnd fur all mein erben des schaden der mir geschach in dem selben holtz von meim herren dem byschof Chu^onrat von Frising vnd seinen leuten, dez selben schaden han ich mich gar vnd gaenczleich verczigen gen meinen herren byschof Chuenrat von Frising vnd seim gotshaus. Daz ich dez allez gebunden sei vnd ze tven vnd ze volfueren vnd staet vnd vnzebrochen beleib, dar vmb han ich disen brief ze ainem vrchunde geben versigelt mit meinem insigel. Dirr brief ist geben ze Welcz do man zalt von Christes geburtt dreutzehen hundert iar vnd darnach in dem vier vnd dreissigisten iar, dez nachsten Montags vor sant Goergen tag.

Source Fulltext: ZAHN, Codex Diplomaticus (=FRA II/35, Wien 1871) S. 219-220