Wir Hans vnd Levtold von Chuenringen veriehen offenlich an disem brief allen den die in sehent, lesent oder hoerent lesen, daz wir gelobt habn mit vnsern trewen dem erwirdigen herren bischof Chu^onraten von Frisingen mit siner veste ze Entzesdorf die er vns enpfolhen hat ze warten die weil er lebt, vnd nyemann anders. Vns sol auch der purchu^ot genuegn die er hern Raenprechten von Ebersdorf vor hat gebn ze Entzesdorf zv^o der hu^ob die er vns an dinst hat lazzen ze ainem powe. Wir suellen ouch mit sinem chasten, mit gerihten vnd mit lavet vnd mit gu^ot niht ze schaffen haben, danne daz wir lavet vnd gu^ot schirmen sullen mit trewen als er vns ez enpfolhen hat. Naemen ouch wir dhainen schaden von der behousung wegn den er vns pillich ab sol legn, den sullen wir an in vordern vnd sol vns dar nach in einem moneid vmb den selben schaden tu^on nach sinen gnaden swaz er gern vns tu^ot, vnd sol vns des genuegn von im vnd von sinem gotshouse. Enpfahen ouch wir dhainen schaden nach sinem toede von der pfleg wegn bei einem andern bischof oder die weil ez an einen bischof stat, den selben schaden sullen wir vordern an sinen nachchomen vnd swenne der selb zv^o dem lande chomt, der sol zwen man nemen vnd wir zwen, vnd swaz vns die haizzent daz man vns tu^o vmb den selben schaden, des sol vns genuegn vnd sol vns des der selb bischof vzrihten in einem moneid. Wir suellen ouch dhainen chrieg an hefn, noch an griffen an vnsers herren bischof Chuenrats wizzen vnd haizzen. Swenn ouch der selb vnser herre bischof Chu^onrat niht ist, so suellen wir mit der veste ze Entzesdorf warten vnd gehorsam sein seinem nachchomen den der bischof von Salzburch bestaetet oder dem daz bistum gebn wirt von dem stuel ze Rom. Vnd daz allez daz staet beleib vnd vnzebrochen daz vor geschriben stet, geb wir dem vorgenanten vnserm herren bischof Chu^onraten von Frisingen vnd sinem gotshouse disen brief versigelten mit vnsern anhangenden insigeln. Der brief ist gebn ze Wienn, do von Christes gepuertt worn drivtzehen hundert iar vnd dar nach in dem vier und drizzigisten iar, an sant Vincencii tag.

Source Fulltext: ZAHN, Codex Diplomaticus (=FRA II/35, Wien 1871) S. 213-214