Wir graf V^olreich von Phannenberg marschalch in Oesterrich vergehen offenlich an disem brief, daz vns der erber herre byschof Chu^onrat von Freysing vnd sein gotshus habnt gewert der hundert march silbers dev er vns verhiez vnd lobt ze gebn, do er mit vnsern herren hertzogen Albrechten vnd hertzogen Otten von Oesterrich beriht wart. Er hat vns auch gewert vnserr purchu^ot die er lobt ze gebn von Entzestorf, von Chu^onratshaim vnd von Randek, der purchu^ot vnd der hundert march sein wir gar vnd gantzlich gewert von im vnd von seinem gotshus.. Dar veber ze einem vrchunde gebn wir im vnd seinem gotshuse disen brief versigelt mit vnserm insigel. Der brief ist gebn do man zalt von Christes geburt druetzehn hundert iar vnd dar nach in dem vier vnd drissigisten iar.

Source Fulltext: ZAHN, Codex Diplomaticus (=FRA II/35, Wien 1871) S. 228-229