Benedictus episcopus seruus seruorum 'dei. Dilecto filio . . . abbati monasterii Campililiorum Patauiensis diocesis salutem et apostolicum benedictionem. Sua nobis dilecti filii . . . abbas et conuentus monasterii in Seytensteten ordinis sancti Benedicti Patauiensis diocesis petitione monstrarunt, quod licet quoddam predium et perceptio quarundam tam ueterum quam noualium decimarum in dicta diocesi consistentium ad ipsos abbatem et conuentum de antiqua et approbata et hactenus pacifice obseruata consuetudine pertinere noscatur, et tam iidem abbas et conuentus essent quam predecessores eorum fuissent in pacifica possessione uel quasi dicti predii ac iuris percipiendi dictas decimas a tempore cuius contrarii memoria non existit, tamen venerabilis frater noster . . . episcopus Frisingensis in dicta diocesi moram trahens, falso asserens predium et perceptionem huiusmodi ad se pertinere et quod ipsi abbas et conuentus illa indebito detinebant, eosdem abbatem et conuentum super hiis coram . . . decano ecclesie Salzburgensis cui venerabilis frater noster . . . archiepiscopus Salzeburgensis loci metropolitanus de facto causam huiusmodi auctoritate metropolitica ad instantiam dicti episcopi audiendam commiserat et fine debito terminandam, fecit ad iudicium euocari. Ex parte uero dictorum abbatis et conuentus fuit coram eodem decano excipiendo propositum, cum huiusmodi cause cognitio ad eundem archiepiscopum per appellationem uel alio modo legitimo deuoluta non esset ipsique abbas et conuentus subditi venerabilis fratris nostri . . . episcopi Patauiensis immediati existerent coram quo parati erant legitime stare iuri, dictus archiepiscopus eidem decano causam ipsam de iure nequiuerat commisisse ipsique abbas et conuentus respondere episcopo super premissis coram eo minime tenebantur et ad id compelli non poterant nec debebant, et quia prefatus decanus eos super hoc audire contra iusticiam recusauit, ipsos in expensis coram eo in huiusmodi causa factis nequiter condempnando, pro parte dictorum abbatis et eonuentus sentientium ex hiis indebite se grauari, fuit ad sedem apostolicam appellatum. Quocirca discretioni tue per apostolica scripta mandamus, quatinus uocatis qui fuerint euocandi, et auditis hinc inde propositis quod canonicum fuerit, appellatione remota decernas, faciens quod decreueris, auctoritate nostra firmiter obseruari. Testes autem qui fuerint nominati, si se gratia, odio, uel timore subtraxerint, per censuram ecclesiasticam appellatione cessante compellas ueritati testimonium perhibere. Datum Auinionis, X. kal. Martii, pontificatus nostri anno primo.

Source Fulltext: ZAHN, Codex Diplomaticus (=FRA II/35, Wien 1871) S. 231-232