Ich Pernger der Vidorfer tu^on kunt vnd vergich offenbar an disem brief allen den die in sehent oder hoerent lesen, daz mich mein herre byschof Chu^onrat von Frising hat geriht vnd gewert gar vnd gaentzlich als mins dienst vnd des schaden vnd aller vordrung vnd ansprache die ich het oder moecht habn an in oder an sein gotshus vnd an sein nahkomen, wa (!) von daz was vnd sein mocht, des bin ich gaentzlich vz geriht vnd gewert vnd sol fuerbaz chain ansprach habn an in, noch hincz seinem gotshus. Vnd ze ainem vrchunde han ich im vnd seinem gotshus disen brief gebn versigelt mit meinem insigel vnd mit Wernharts insigel von Scharferveld. Ich Wernhart von Scharfervelt vergich, daz ich durch bet Perngers von Vidorf min insigel han ze vrchuend gehenget an disen brief aller der ding die hie vor geschriben stant zu^o Perngers insigel. Der brief ist gebn ze Waidhouen, do man zalt von Christes geburtt druczhen hundert iar vnd dar nach in dem fuemf vnd drissigisten iar, an sand Mathias tag.

Source Fulltext: ZAHN, Codex Diplomaticus (=FRA II/35, Wien 1871) S. 232