In nomine Christi amen. Nos Laurencius dei gracia Gurczensis ecclesie episcopus, Emcho de Altzeia prepositus Werdensis Saltzburgensis dyocesis et Hainricus canonicus Frysacensis et plebanus in Greytzensteten Saltzburgensis et Patauiensis dyocesum, arbitri, arbitratores sev amicabiles compositores in causis que inter reuerendum in Christo patrem dominum Chunradum Frisingensem episcopum et eandem ecclesiam Frisingensem ex vna parte ac venerabilem patrem dominum Dyetricum abbatem et conuentum monasterii in Seytensteten ordinis sancti Benedicti dicte Patauiensis dyocesis idemque monasterium ex altera uertitur super decimis noualium parrochie in Gestnich eiusdem dyocesis et super pensione sev censu unius libre reddituum Wiennensium monete quam dictus dominus episcopus a dictis abbate et conuentu atque monasterio petebat nomine parrochialis ecclesie in Holnstein similiter eiusdem dyocesis, et super quodam predio sito in parrochia Pyberbach dicto wlgariter an dem Pache in quo nunc residet Dyetricus, ac super parte domus quam habent et possident abbas, conuentus et monasterium predicti in ciuitate Waidhouen, quam quidem partem dicebat dominus Frisingensis prefatus cecidisse in commissum occasione census sev canonis non soluti, a dictis partibus communiter electi, auditis hinc inde propositis, diligenti tractatu et deliberacione premissis sententialiter et diffinitiue pronunciamus, laudamus, arbitramur, statuimus et ordinamus, quod abbas et conuentus et monasterium antedicti decimas omnes predicte parrochie in Gestnich antiquas et nouas, de cultis et colendis, presentes et futuras libere, absque inpeticione, inquietacione et perturbacione qualibet dicti domini episcopi Frisingensis et successorum suorum ac rectorum ecclesie in Gestnich sev cuiuscumque eorumdem vice vel nomine perpetuo debeant retinere, ita quod monasterium Seytesteten et eius abbates sev officiales quicumque in locando, colligendo, ducendo, triturando, reponendo et conseruando easdem decimas presentes et futuras, tam in bonis sev prediis ecclesie Frisingensis quam alibi non impediantur quomodolibet, directe vel indirecte, quominus vtilitatem et commoditatem suam ac monasterium libere possint facere de eisdem, absque tamen offensa et iniuria dolosa vel maliciosa hominum et prediorum dicte ecclesie Frisingensis. Porro, vt rector ecclesie in Gestnich decencius valeat sustentari, ac nichilominus pro bono pacis et concordie arbitramur, laudamus et diffinimus, ut abbas et conuentus sev monasterium prefati solvant quinquaginta libras Wiennensium veterum in duobus terminis infrascriptis, videlicet in festo Epiphanie libras viginti quinque et in festo Pentecostes immediate sequenti libras viginti quinque, eademque pecunia assignetur ex parte abbatis et conuentus et deponatur aput honorabilem virum dominum Emchonem de Alczeia et ibidem conseruetur, donec ecclesie in Gestnich ex ea certi redditus qüi ipsi ecclesie et eius rectoribus perpetuo remaneant, comparentur. Pro pensione vero sev censu unius libre que petebatur nomine ecclesie in Holnstein, arbitramur et diffinimus, ut abbas, conuentus et monasterium in loco predicto assignent et deponant libras quindecim prefate monete in duobus terminis antedictis, videlicet medietatem in uno et medietatem in reliquo, ita quod pro eis ipsi ecclesie in Holnstein vnius libre redditus comparentur per eandem ecclesiam et rectores eius perpetuo possidendi. Item predium supradictum an dem Pache in quo Dyetericus residet, cum omni iure quo idem Dyetericus ipsum nunc possidet, arbitrantes adiudicamus dicto domino episcopo et ecclesie Frisingensi, sic tamen quod in aliis bonis sev prediis prefato predio immediate vel mediate adiacentibus que nunc abbas et monasterium paciffice et quiete possident, dictus dominus Frisingensis et eius successores nullum ius sibi vindicent vel usurpent. Arbitramur etiam, laudamus et diffinimus, vt pars illa domus monasterii sita in Waidhouen de qua fuit questio, absque inquietacione et exaccione quacumque deinceps remaneat ipsi monasterio in Seytensteten in ea libertate qua fuit et est, reliqua pars maior domus eiusdem ceterum, vt inter eos omnis, controuersie materia suffocetur, arbitramur, laudamus et diffinimus, ut omnis accio, questio sev impeticio quam alterutra parcium predictarum habuit vel habere posset in futurum contra alteram super pensionibus, censibus, canonibus vel decimis non solutis vel aliis quibuscumque occasione premissorum, sopite sint penitus et sepulte. Actum et datum anno domini millesimo trecentesimo tricesimo quinto, in octaua beati Laurencii martiris, in castro Wienne, coram magnificis principibus dominis Alberto et Ottone ducibus Austrie, Styrie et Karinthie et presentibus venerabili in Christo patre et domino Nycolao Constantiensis ecclesie episcopo, domino Heinrico plebano ad sanctum Stephanum in Wienna et domino Nycolao plebano in Marchpurga, Hermanno comite de Ortenburch et Vlrico comite de Phannenberg et nobilibus viris Johanne de Capella, Vlrico, Eberhardo et Friderico de Walse et aliis pluribus fidedignis et honestis. In cuius rei testimonium presentes litteras appensionibus nostrorum sigillorum duximus roborandas.

Source Fulltext: ZAHN, Codex Diplomaticus (=FRA II/35, Wien 1871) S. 240-242