Ich Perichtold Schefelt vnd mein eriben vergechen mit disem brif vnd tun chunt allen den die in horent, sechent oder lesent, daz wir mit vnsern triwen gelubt vnd verhaizzen haben dem ernwirdigen fursten vnserm genedigen herren pyscholf Chunraten ze Freising daz im vnd seim gotzhaus vnser genedig herren her Reinprecht vnd her Fridereich von Walse auz richten sullen zwischen hinn vnd Mitteruasten den hof ze Sperchsteten der von dem herzogen lechen ist, vnd waz dar zv gehort, also daz iem vnd seim gotzhaus der herzog von Osterreich den selben hof steten sol vnd sein gunst vnd will darzv geben sol dez chauffes als sein brif sagt. Teten dez vnser egenant herren nicht her Reinprecht vnd her Friderich von Walse, swenn vns denn vnser egenanter herr pyscholf Chunrat oder sein nachchumen vadern, so sull wir dar nach iner acht tagen laysten hincz Waidhouen mit aim chnecht vnd mit zwain pferiten in ein erber gasthaus vnd nicht auz chomen vntzt vnserm vorgenantem herren pischolf Chunraten vnd seinen nachchumen der egenant hof gantz vnd gar auz gericht wirt vnd bestet von dem herzogen. Vnd dar vber ze einem vrchunt geben wir im disen brif gesigelten mit vnserm anhanguntem insigel. Daz ist geschehen nach Christes gepurd vber dreuzehen hundert iar, dar nach in dem virczkistem iar, an sand Dorothee tag.

Source Fulltext: ZAHN, Codex Diplomaticus (=FRA II/35, Wien 1871) S. 276