Ich Hainrich von Salle weylent richter ze Waydhouen vergich offenlich an disem prief allen den die in sehent, hoerent oder lesent, wanne der prief vnd hantueste den ich het von minem herren pischof Albrechten von Freysingen vmb daz gerichte ze Waydhouen, verlorn ist, gelobe ich bi minen trewen vnd han dar nach zu^o den hayligen gesworn, ist daz daz der selbe prief funden werde vnd an daz lieht koem, daz der selbe prief dehain kraft noch maht sol haben vnd sol freyliehen tode sein, vnd were daz daz der selbe prief funden werde vnd an daz lieht koem, so sol ich in bi dem vorgenanten ayd minem vorgenanten herren . . . von Freysingen oder sinen amptluten oder dyenern antwerten an allez verziehen vnd an allez geuerde. Vnd dez ze vrkuende gib ich mit wolbedahtem mu^ot vnd da ich ledich vnd vngeuangen was, disen prief versigelten mit minem insigel daz dar an hanget. Dez sint gezivg her Chu^onrat von Avrach lantrihter, Albreht vnd Michahel die Prater, O^etlin Schorn vnd ander erber luet genueg. Daz geschah do man zalt von Christs gebuerth drivzehenhundert jar vnd dar nach in dem aim vnd fuemfzigsten jar, an dem Sampstag vor sant Johans tag zu^o den Suenwenden.

Source Fulltext: ZAHN, Codex Diplomaticus (=FRA II/35, Wien 1871) S. 294