Ich Hainrich von Salle weilent richter ze Waydhouen vergich offenleich an disem brief vnd tuen chunt allen den die disen brief sechent, lesent oder horent, daz vmb die sach vnd auch etleieh schuld die ich meinem herren pyscholf Albrechten von Freysing verraitten sold, vnd dar vmb der selb mein herr von Freysing vnd sein amptlaeut mich gefangen heten, mit dem vorgenanten meinem herren vnd seinen amptlaeuten verricht pin vnd verraittet han gar vnd gaenczleich an allen sachen vnd stuchen die si mit mir vnd ich mit in ze schaffen heten, vnd sein freuntleich vnd liehpleich (!) mit ein ander verricht also beschaydenleich, daz ich noch mein freunt dhain fei(n)tschaft dar vmb tragen schullen noch haben gegen meins vorgenanten herren von Freysing ampleuten vnd dyener in allem weg, vnd han in dez mein trew gegeben vnd dar nach zu den heyligen geswaren einen gestalten ayd fuer mich v(n)d fuer all mein freund an allez gefaer, vnd wer daz daz ich daz veber fuer vnd mich in der vorgenanten sach vergaezz, ez wer mit worten oder mit werchen, in welchem weg daz geschaech, so sol ich auf der stat an alle vertail vnd an alle widerred leibs vnd guetz veruallen sein dem vorgenanten meinem herren von Freysing vnd seinem amptlaeten (!) vnd dyenaeren an all genad. Der vorgeschriben sach gib ich disen brief zu einem verchunde der warchait vnder Chuenratz von Awrach zden zeiten lantrichter anhangunden in sygel vnd mit meinem vnd mit Albrechts dez Prater anhangunden insygel. Ich Chuenrat von Awrach zden zeiten lantrichter vnd ich Albrecht Prater vergechen daz wir durch Hainreichs dez vorgenanten Saller pet willen vnsrew insygel haben gehengt an disen brief. Dicz ist geschechen vnd der brief geben do man zalt von Christi gepuerd dreutzechen hundert jar, dar nach in dem ain vnd fumfczigesten jar, dez Samztags von Sunibenden.

Source Fulltext: ZAHN, Codex Diplomaticus (=FRA II/35, Wien 1871) S. 294-295