Clemens episcopus seruus seruorum dei. Dilecto filio Alberto electo Frisingensi salutem et apostolicam benedictionem. Meritis tue deuotionis quam ad nos et Romanam ecclesiam geris; inducimur ut petitionibus tuis in hiis maxime que tuas et ecclesie tue oportunitates respiciunt, fauorabiliter annuamus. Sane petitio pro parte tua exhibita continebat, quod propter diutinam absentiam bone memorie Johannis episcopi Frisingensis predecessoris tui non ualentis in sua Frisingensi ecclesia ob temporis tunc currentis malitiam residere, ecclesia ipsa per nonnullos tirannos illarum partium in suis bonis et iuribus multipliciter oppressa magnisque debitorum oneribus pregrauata ac ipsius edificia diruta et collapsa existunt et insuper redditus mense tue episcopalis Frisingensis propter maximam mortalitatis pestem que in illis partibus uiguit, sunt adeo diminuti, quod predicta debita soluere ac edificia reformare et alia tibi incumbentia onera supportare non posses, nisi tibi super hiis per apostolice sedis gratiam de benignitate solita consulatur. Quare nobis humiliter supplicasti, ut pro reparatione edificiorum ac solutione debitorum huiusmodi parrochialem ecclesiam in Lok Aquilegiensis diocesis ad presentationem . . . episcopi Frisingensis qui est pro tempore, pertinentem tibi et mense tue predicte annectere et unire perpetuo dignaremur. Nos itaque tuis et ipsius ecclesie tue cupientes necessitatibus prouidere, tuis in hac parte supplicationibus inclinati predictam parrochialem ecclesiam cum omnibus iuribus et pertinentiis suis tibi et mense tue episcopali predicte auctoritate apostolica in perpetuum annectimus et unimus, ita quod cedente uel decedente rectore qui nunc est, ipsius ecclesie uel alias eo ipsam ecclesiam quomodolibet dimittente, liceat tibi auctoritate propria per te uel alium seu alios possessionem corporalem ipsius ecclesie libere apprehendere ac licite retinere diocesani loci et cuiuscunque alterius licentia minime requisita, reseruata tamen primitus et assignata per loci ordinarium de ipsius ecclesie redditibus et prouentibus perpetuo vicario inibi domino seruituro in eadem ecclesia canonice instituendo congrua portione ex qua idem vicarius ualeat commode sustentari, episcopalia iura soluere aliaque sibi incumbentia onera supportare, non obstantibus si aliqui super prouisionibus sibi faciendis de huiusmodi ecclesiis uel aliis beneficiis ecclesiasticis in illis partibus speciales uel generales apostolice sedis uel legatorum eius litteras impetrarint, etiam si per eas ad inhibitionem, reseruationem et decretum alias quomodolibet sit processum, quas litteras et processus habitos per easdem ad prefatam parrochialem ecclesiam uolumus non extendi, sed nullum per hoc eis que ad assecutionem ecclesiarum et beneficiorum aliorum preiuditium generari seu quibuscunque priuilegiis, indulgentiis et litteris apostolicis generalibus uel specialibus quorumcunque tenorum existunt, per que presentibus non expressa uel totaliter non inserta effectus earum impediri ualeat quomodolibet uel differri, et de quibus quorumque totis tenoribus de verbo ad verbum habenda sit in nostris litteris mentio specialis, nos enim irritum decernimus et inane si secus super hiis a quoquam quauis auctoritate scienter uel ignoranter contigerit attemptari. Nulli ergo omnino hominum liceat hanc paginam nostre annexionis, unionis et constitutionis infringere uel ei ausu temerario contraire, siquis autem hoc attemptare presumpserit indignationem omnipotentis dei et beatorum Petri et Pauli apostolorum eius se nouerit incursurum. Datum Auinionis, XIII. kalendas Julii, pontificatus nostri anno decimo.

Source Fulltext: ZAHN, Codex Diplomaticus (=FRA II/35, Wien 1871) S. 297-298