Ich Jacob der Naenhofer chorherre ze Freysingen vnd probst ze Slyers vnd auch zu^o den zeiten gewaltiger weinprobst in dem Gepirge vergihe offenleichen an disem priefe, daz ich mit vollem gewalt an meiner herren stat von Freysingen hin verlihen vnd gelazzen han recht vnd redleichen ewichleichen vnd durchschleihtz fuer ain frey lediges gu^ot von maenichleichen ain stukhe weingarten daz in der Mulgreye ze Perbian gelegen ist vnd das vormalen Pauls von Eysakh inne gehabt hat, daz saelbe vorgeschriben stukhe weingarten besu^ocht vnd vnbesu^ocht vnd mit allen den rechten vnd nuetzzen die dar zue gehoerent, also han ich daz vorgeschriben stukhe weingarten nu hin verlihen vnd gelazzen Nyklein von Vilanders von Pardell vnd allen seinen erben, mit ainem sogetanen gedinge daz si iaerichleichen meinen vorgenanten herren von Freysingen da von zinsen vnd dienen suellent ain vern weins Potzner mazz vnd anders niht vnd also sol in der vorgeschriben zinss vnd dienst ewichleichen nimmermer gehohert noch gemert werden mit dehainen sachen. Vnd zu^o ainem vrchuende der warhait han ich vorgenanter Jacob als ain weinprobst mit vollem gewalt an meiner vorgenanten herren stat von Freysingen mein aygen insigel an disen prief gehencht. Daz ist geschehen da man zalt von Christes gepurt dreuzehen hundert iar vnd dar nach in dem zway vnd fuemfczigisten iare, an sand Marteins abant (!).

Source Fulltext: ZAHN, Codex Diplomaticus (=FRA II/35, Wien 1871) S. 298-299