Wir Albrecht von gotes genaden byschof ze Freysingen veriehen offenlich mit disem brief allen den die in an sehent oder hoerent lesen, daz wir mit den ersamen gaistlichen laeueten bru^oder Johansen zden zeiten prior vnd mit dem conuent dez gotzhaus ze Mavrbach recht vnd redlich veber ain chomen sein vmb den perg der da gehaizzen ist Chalhochsperg, der da gelegen ist bei dem spital ze Maurbach, dar an ainhalb gestozzen ist der grab zwischen dem spital bis in den Mavrbach vnd nach dem Mavrbach ze tal bis an den Schuetwuerfel vnd auf wertz bis an Gaeblitzer march, also daz wir in den obgenanten perg recht vnd redlich verchauft haben mit allen den eren, rechten vnd nuetzzen die dar zu^o gehoerent, alz ver die obgenanten march sagent, mit holtzz vnd mit wismat vmb sechtzzig pfunt Wienner phenning der si vnz gar vnd gantz bericht vnd gewert habent, vnd suellen wir noch vnser nachkomen fuerbas an dem obgenanten perg dhain ansprach ewichlich haben noch gewinnen. Vnd dar veber ze vrchuend geben wir in disen offen brief fuer vnz selb vnd fuer all vnser nachkomen mit vnserm anhangenden insigel besigelten, der geben ist ze Wienn an Samcztag nach sant Gregoerien tag, nach Christes geburt dreuzehen hundert jar, dar nach in dem vier vnd fuenftzzgisten jar.

Source Fulltext: ZAHN, Codex Diplomaticus (=FRA II/35, Wien 1871) S. 301