Ich Hainreich von Rauhenstain vnd mein erben vergehen offenleich an disem brief, daz wir vns des mit vnsern trewen an aides stat an alles geuaer verluebt vnd verpunden haben gegen Christan vnd gegen Wernharten den pruedern den Taehenstainern vnd gegen irn erben vmb den schaden den si von vnsern wegen enphangen habent an irm guet ze Margrafenneusidel also daz wir in ze einer pezzrunge fur den selben schaden leihen suln sechs phunt oder acht phunt Wienner phenninge geltes die naehsten die vns mit recht ledig werdent vnd die si an vns pringent, an alle wider rede, vnd dar veber so gib ich Hainreich von Rauhenstain fuer mich vnd fuer mein erben Christan vnd Wernharten den pruedem den Taehenstainern vnd irn erben disen brief zu einem warn vrchu^ende diser sache versigilt mit meinem insigil vnd mit hern Wilhalms insigil von Pavmgarten vnd mit Vlreichs insigel des Sweinwarter die diser sache gezeuge sint mit irn insigiln. Diser brief ist geben ze Wienne nach Christes geburt dreutzehen hundert iar, dar nach in dem sechs vnd fuemfczgisten iar, des Mittichens in der andern ganczen Vastwochen.

Source Fulltext: ZAHN, Codex Diplomaticus (=FRA II/35, Wien 1871) S. 308-309