Wir Rudolff von gots gnadn herczog ze Osterreich etc. etc. tun chund, daz wir vnsern getrewn den purgern gemainlich von Waidhofen durch pezzerung willen vnsrer pruhk daselbs ze Waidhofen erlaubt habn vnd erlaubn ouch daz si vf ainen iglichn wagen der geuast vnd geladn ist mit weyn oder mit getrayd vnd der da durch get, gelegn mugen alz vil phenning als das von alter herchomen ist, vnd diselbn phenning die in dauon geuallnt, sullen sy mit ainer guten chuntschaft vnd sunderlich mit wizzen vnsers getrewn Jansen des Chneussr oder swer vnser pfleger ze Waidhofen ist, ze pezzerung der egenanten prukkn daselbs ze Waidhofen anlegn nach irn notdurften vnd sulln si diselbn phenning nemen von den egenantn wegn alz lang, vntz daz wir, vnser brueder oder vnser erbn das widerruffen. Mit vrkund ditz brifs besigelten mit vnserm haimlichn zaichn. Der brif ist geben ze Admund an vnser Frawntag ze der schidung anno domini millesimo tricentesimo sexagesimo primo.||
+ Hoc est verum. +||
Joh. Trawner.

Source Fulltext: ZAHN, Codex Diplomaticus (=FRA II/35, Wien 1871) S. 335-336