Stiftbrief vber 6 march Aglayer pfening, ain guet messpuech vnd ain gancz mess gewant, ain guet khölich vnd ain guet creucz von herrn Hainreich pfarrer zu Oberwels durch gott vnd durch sunder freundschafft vnd andacht die er zu dem herrn Mers probst, dem capitl vnd dem gotshaus sand Katharina ze Stenz gehabt hat, geben vnd gestifft worden sechs march Aglayer pfening gelts die er von Gerolden dem Ratgeb purger zu Oberwelss khaufft hat alss di brieff sagent die er dem probsten vnd dem capitl geben hat, item ain guet messbuch vnd ain guet messgewant, ainen gueten khölich vnd ain guet creuz dem vorgenanten herrn probst, dem capitl vnd gotshauss sand Catherein zu Stenz, inn solicher gestalt dass die egenante herrn für im herrn Hainraich vnd seine vödern darumb ein ewige mess alle tag auf sand Dorothea altar im closter zu Stenz vnd da soll man alle wochen sprechen ain mess Vnnser frawen vnd aine von sand Dorotheen vnd ain seelmess, die ander vier mess von welichen heilligen man will, vnd sollen auch ainen ewigen jartag dauon begeen vier stund im jar je zu den quatembern mit selmesse vnd vigili. Auf diss haben die herrn herr Mert probst vnd das capitl des gotshauss sand Catherein zu Stenz dem vorgenanten herrn Hainreich solhes wie obgeschriben stehet, zu halten angelobt bey iren gewissen vnd vrkhund des prieffs der versigelt ist mit sein egenanten probst Merten vnd mit des capitl anhangunden insigeln, geben nach Christs geburt dreuzehenhundert jar vnd darnach im zway vnd sechzigistem jar des Erchtags nach Mitterfasten, anno 1362.

Source Fulltext: ZAHN, Codex Diplomaticus (=FRA II/35, Wien 1871) S. 337-338