Ik Heinric Vanden Hove, Roebrecht Colyn, Iakemyn De Bone, Ian Griseweder, ende Clais Van Woemen, scepene ende coeriers van Veurneambacht, doen te wetene tallen den ghenen die dese lettere sullen sien of horen lesen, dat Willem Are ende Lisebette syn wyf, camen vor ons ende gaven up, wel ende wettelike, met halmen ende met ghiften, broeder Kerstiane Springhescoe, procureerc vander kerken van S. Niclaus, ter vorseider kerken behouf, twee linen lants quiter erven, lettel min of meer, ligghende in de prochie van S. Niclaus boosterpoort, bewester stede, daer Gillis Vander Beerst wonende was, datmen scelt Oudehittestic, twelke lant voorseit, broeder Kerstiaen vorseit, als procureerre vander voorseider kerken, ende over de kerke voorseit, ende in hare name, drouch weder up wel ende wettelike met halmen ende met ghiften, Willem Aren, ende Lisebetten sinen wive voorseit, ende haerlieder oire, om xm scellinghe, twee penninghe parisisen ende enen hallinc tsiaers, eweliker renten, den groten tornoysen over twaelf penninghe paresis of ander munte int avenant te gheldene, broeder Kerstiaen vorseit of den ghenen die procureirre wesen sal vander voorseider kerke tenen paimente tsiaers, dats te wetene te S. Ians messe, te midsomere nu eerst comende, ende alsoe voort elx iaers ten paiment daghe vorseit, ewelike ghedurende. Ende ware oec dat sake, datmen dese vorseide ewelike rente niet ne goude elcx iaers ten paiment daghe vorseit, ende teen paiment tander payment achterhaelde onvulgouden, soe had de broeder Kerstiaen vorseit of de ghene die procureire wesen sal vander vorseide kerke macht hant te slane an dit vorseide lant, ende notent ende plotent, toter tyt datmen sal hebben iechenen schadeloos, alle paimenten van verledenen daghen van deser vorseider eweliker renten, de welke ewelike renten vorseit, so hebben Willem Are ende Lisebette syn wyf vorseit belovet over hem selven, ende over haerlieder oir, der vorseide kerken van S. Niclaus ewelike te warandeirne, naer wetten vanden lande. Ende es te wetene dat de kerke van S. Niclaus vorseit, comen es in dese vorseide ewelike rente omme de redene, dat het ghewyst was te wetten, dat Willem Aers vorseit lantwech hebben soude, over der vorseider kerken lant, twelke so hevet gheamortiziert. In orconscepen van desen dinghen hebben wi scepene, ende coeren voorseit, onse zeghele ghangen an deze lettere die was ghemaect int iaer ons Heren m° ccc° lxiiii°, upten tiensten dach van Hoymaendt.

127