Magnifico viro domino Emerico Bubeck de Pelseuch, magistro tavernicorum regalium, iudex et iurati civitatis Posoniensis benevoli ac indefessi obsequii incrementum. Magnifice vir et domine. Intelleximus, quod in quibusdam literis ex parte una quorundam Cipsensium et Casparis Ventur et sociorum suorum parte ab altera super ablatione duorum curruum cum cera ablatorum et receptorum dubium vobis ortum fuisse, utrum dicti Cypsenses cum quatuor curribus vel cum sex curribus ad locum tributi in Posonio devenissent apud turrim aque solitum et exigi consuetum. Serenissimo principi et domino domino nostro regi, pridem magnificentie vestre clarius damus intelligere per presentes prout hoc ex veridica tributariorum loci pretacti intelleximus relatione, quod dicti Cypsenses sex currus habuissent et solummodo cum quatuor curribus ad verum locum tributi ad prefatum locum prope turrim aque devenissent et ibidem de eisdem quatuor curribus tributi solutione more communi cum cupro oneratorum satisfactionem omnimodam impenderint. Sed de residuis duobus curribus cum cera oneratis coram dictis tributariis nullam fecissent mentionem, neque ad locum tributi prefati pervenissent, sed a tergo loci eiusdem tributi transfretare voluissent. Sic tributarii videlicet domini Smylonis de Vetavia pro tunc comitis Posoniensis et abbatum videlicet Sacri Montis Pannonie et Pilisiensis alios duos currus cum cera oneratos et in inconsueto loco repertos et propter tributi denegacionem receperunt et inter se unusquisque tributariorum suam partem diviserunt, prout hoc idem tributarii ad sue fidei puritatem et honorem coram nobis recognoverunt. Idemque recognoscimus harum nostrarum testimonio literarum. Datum Posonii, proxima feria sexta ante festum beate et gloriose virginis et martyris Margarethe, anno Domini MCCCCX. [1410. júl. 11.]