A Capsa 31 S (777) DF 207586 újkori másolata||
Omnibus Christi fidelibus presentibus pariter et futuris presencium noticiam hahituris capitulum ecclesie Iauriensis salutem in salutis largitore. Ad durabiliorem rei geste memoriam harum serie volumus pervenire, quod nos summa cum reverencia receptis literis annualibus serenissimi principis domini Sigismundi, Dei gracia Romanorum regis semper augusti ac Hungarie, Bohemie, Dalimacie, Croacie etc. regis, domini nostri metuendi pro parte domini Ioannis abbatis claustri Beati Martini de Sacro Monte Pannonie ceterorumque religiosorum in eodem claustro Deo eterno iugiter serviencium confectis, eisdem per ipsam regiam serenitatem per anni circulum more solito ad inquisiciones, evocaciones metarumque possessionum apud manus ipsorum pacifice habitarum reambulaciones ac ad omnia alia, que talibus in processibus iuxta consuetudinem ipsius regni fieri consueverunt, peragenda concessis nobisque preceptorie transmissis, iuxta earundem continenciam una cum Benedicto de Chatar homine regis in eisdem literis annualibus inter alios homines regios nominaliter conscriptos expresso nostrum hominem videlicet honorabilem virum magistrum de Kalthaza socium et concanonicum nostrum ad infra scriptam reambulacionem metarum possessionis dictorum religiosorum Ilbew vocate commetanee cum possessionibus Barsunus, Ewrs, Olop, Bana, Babona et Tarkan nostro pro testimonio fide dignum duximus transmittendum. Qui demum exinde ad nos reversi nobis concorditer retulerunt, ut prelibatus homo regius presente nostro testimonio feria quarta proxima post dominicam Invocavit proxime preteritam [1412. febr. 24.] et aliis diebus ad id aptis ad faciem dicte possessionis Ilbew dictorum religiosorum comitatus Comaromiensis vicinis et commetaneis eiusdem universis illud legitime convocatis et presentibus accessisset, ipsamque possessionem a dictis possessionibus Barsunus, Ewrs, Olup, Bana, Babona et Tarkan earumque pertinenciis sub infra scriptis metarum cursibus taliter sequestrasset:||
Quod primo non procul a palude lutosa intra vias, per quas ex Ewrs iretur ad Ilbew, invenissent tres metas terreas angulares, quarum una versus meridiem ad Barsunus, alio versus occidentem ad Ewrs, tercia versus septentrionem ad ipsam possessionem Ilbew pertinerent. Inde ad plagam septentrionalem directe procedendo ad valliculam quandam pervenissent, et ibidem metam terream reperissent, quam et renovassent. Ab ipso ad eandem plagam tendendo colliculum quendam vulgo halom dictum pro meta invenissent et reliquissent. Item aliquantum ad orientem declinando et per bonum spacium procedendo ad duo fossata equaliter distancia et per longum protensa, quorum unum possessioni Ewrs ad occidentem, aliud autem possessioni Ilbew ad orientem deserviret, pervenissent et intra eadem fossata per bonum spacium eundo in quendam rivulum vulgo Er dictum incidissent et intra et penes rivulum in quodam oblongo fossato fluentem pro meta distinctiva habendo venissent ad quedam dumeta zilbokor nominata ibique duas metas reperissent, quarum una versus occidentem possessioni Olup, ad orientem ipsi possessioni Ilbew deservirent. Deinde ab eodem rivulo non deflectendo in bono spacio ad arbores populeas nyarfa dictas pervenissent et alias duas metas reperissent, quas et renovassent. Deinde in spacio competenti circa eundem rivulum unam arborem chonka nyarfa dictam pro meta reperissent. Abhinc ipsum rivulum ad septentrionem reliquendo et prope per fossatum ad collem sarga hegy dictum versus orientem declinando et collem eundem in quodam fossato circumgyrando per competens spacium ad paludem quandam lutosam pervenissent, quam transeundo et inter duo fossata ascendendo ad fines terrarum arabilium possessionis Babona tres metas angulares reperissent, quarum una versus septentrionem ad Bana, alia ad orientem possessioni Babona, tercia demum in occidentem dicte possessioni Ilbew deserviret. Abhinc directe ad meridiem declinando et in quodam fossato per bonum spacium procedendo pervenissent ad parvum collem kis halom dictum, in quo duas metas antiquas invenissent, quarum una versus orientem ad Babona, alia versus occidentem ad Ilbew pertineret. Deinde ad eandem plagam procedendo in competenti spacio in alio colle similiter halom dicto tres metas terreas veteres invenissent, quarum una ad Babona, alia ad Ilbew, tercia autem angularis ad meridiem possessioni similiter ipsius ecclesie Beati Martini de Sacro Monte Pannonie Tarkan dicte deserviret. Hinc directe ad orientem deflectendo et per campum aliquot fossata ipsam possessionem Tarkan et Babona distinguencia reperiendo, usque ad metas inter vias Iaurienses, per quas de villa Chep iretur ad eundem civitatem, existentes possessionis eiusdem ecclesie Beati Martini Kapolna aliter Kis Chanak dicte processissent et amplius ire necessum non habuissent. Predictam autem possessionem Ilbew ab aliis taliter sequestratam ipsi monasterio predicto sub suis veris et antiquis metis perpetuo reliquissent possidendam, nullo peritus contradictore inibi apparente, legitimis et sufficientibus diebus ibidem persistendo. In cuius rei memoriam firmitatemque perpetuam presentes contulimus literas nostras privilegiales pendentis et autentici sigilli nostri munimine roboratas. Datum in festo Beati Valentini martiris, anno Domini M CCCC XII. [1412. febr. 14. (!)] honorabilibus et circumspectis viris dominis Gallo preposito, item reverendo in Christo patre Valentino cardinale ecclesie Quinqueecclesiensis domino honorato, ecclesie nostre gubernatore, Thoma cantore, Demetrio custode, ceterisque dominis canonicis in dicta ecclesia nostra Deo iugiter famulantibus et devote.