† Notum sit omnibus Deum timentibus tam futuris quam et presentibus, quia ego Adalbertus iussu gloriosissimi G(eise) regis Hungarie, Dalmacie, Crhoacie, Rameque, set et venerabilis M(artyrii) archiepiscopi cunctorumque regni primatum decreto R(ogerio) regi Sicilie, Apulie Capueque verba legacionis laturus, considerans presentis vite cursum miserabilem, nec etatis mature semper attingere finem, domini regis, regni maiorum et H[odun] fratris mei cunctorumque consanguineorum meorum consciencia omnem patrimonii mei porcionem, quam me hereditario iure novi contingere, nec non et ea, que regi serviendo parta composui, more priorum cura sollerti his testibus adibitis domno R(aphaele) archiabbate cum omnibus confratribus et pristaldo regis, filio Taciani testamentoque litterarum firmata, sic profecturus disposui. Quia vero dominus momenta cum temporibus eventusque rerum omnium in solius sui potestate firmata, mortalium sollerciam nullatenus prescire concessit, hec ideo tali condicione firmamus, ut si, qui via veritas est et vita, sue prosperitatis progressum nobis regressumque concesserit, cuncta nostro, quemadmodum pium et ius exigit, ut et nunc subiecta sint iudicio. Itaque predium Philes cum quatuor servis et uno aratro et triginta examinibus apium, predium Druc cum duobus servis et uno aratro et silva, predium Iac cum liberis hominibus, predium Suesla cum uno servo et uno aratro, predium Heulichin cum uno aratro et uno debitore sex pensarum, Beato M(artino) commendo. Fratri meo H[odun] predium Niwic cum duodecim bubus et tribus hominibus, predium Gnir cum silva committo; predium Couroug cum duodecim bubus et duobus servis cum filiis et filiabus et triginta equis indomitis et quadragintaquinque ovibus filie sororis mee Christine dispono. Uxori quoque mee predium de Bolatin cum uno aratro et duobus servis et filiis tantum et duabus vineis duobus cum cultoribus, predium Naragc cum tribus servis et filiis et filiabus et duobus aratris et duabus vineis in Sala, et uno cultore cum filio, predium Gormot cum uno aratro et quatuor hominibus, predium Pririza cum quatuor servis et quatuor vineis, habitatores vero libertatem habent eundi quo volunt; et partem insule cum quatuor piscatoribus pleno cordis affectu commendo; Gormot vero et insulam Obda et Prizam hac ei condicione commendo, ut si iudicio domini vocatus obiero, dum mei memor fuerit exequiis et oracionibus. Cum autem, quod humanum esse scio, nec oppono, iuxta sue nobilitatis normam viro nubere decreverit, cum supradictis prediis Beato M(artino) commendo. Ancillas omnes quas habeo uxori mee concedo. Quod si Deus misericordie heredem, quam (!) exspecto, mihi tribuerit, duas partes omnium meorum ipse habeat, terciam ecclesia Beati M(artini). Seunic cum duobus filiis, Ceiga cum duobus filiis, et Vandiga cum sorore sua, Lipiza cum filiis et filiabus, Hunigc cum duobus filiis, et duabus filiabus, Magia libertatem habeant. Peccora boves, porcos, oves et reliqua victui pauperum dispono. Omnes libros, quos proprios habeo, ecclesie Beati M(artini) commendo.