Alexander episcopus, servus servorum Dei, venerabilibus fratribus archiepiscopis et episcopis per Ungariam constitutis salutem et apostolicam benedictionem. Ad vestram non dubitamus audientiam pervenisse, quanta sancte memorie rex Stephanus monasterium Sancti Martini de Pannonia donaverit libertate; et que illi temporibus felicis recordationis Paschalis pape et nostro privilegia apostolica sedes indulserit, agnovistis. Quia igitur quanto libentius vultis apostolicum auxilium optinere et in vestris celerius postulationibus exaudiri, tanto propensius loca, que sacrosancte Romane ecclesie specialiter iuris existunt, in suo vos convenit iure tueri et eorum libertates custodire (atte)ntius illibatas: universitati vestre per apostolica scripta mandamus atque precipimus, quatinus prescripto monasterio vel pertinentiis eius non inferatis molestiam, nec ab aliis permittatis inferri, sed libertatem, quam rex prefatus concessit et sedes apostolica confirmavit, inviolabiliter observetis et observari ab aliis faciatis, ita quod querela super hoc ad audientiam nostram perferri non debeat, nec vos de contemptu aut negligentia indignationem oporteat sedis apostolice formidare. Datum Tusculani Nonis Ianuarii. [jan. 5.]