Urbanus episcopus, servus servorum Dei, dilectis filiis Simili abbati monasterii Sancti Martini super Pannoniam siti eiusque fratribus tam presentibus quam futuris regularem vitam professis in perpetuum. Effectum iusta postulantibus indulgere et vigor equitatis et ordo exigit rationis, presertim quando petentium voluntatem et pietas adiuvat et veritas non relinquit. Eapropter, dilecti in Domino filii vestris iustis postulationibus clementer annuimus et prefatum monasterium Sancti Martini in Monte super Pannoniam siti, in quo divino estis obsequio mancipati, sub Beati Petri et nostra protectione suscipimus et presentis scripti privilegio communimus, inprimis siquidem statuentes, ut ordo monasticus, qui secundum Deum et Beati Benedicti regulam in eodem monasterio institutus esse dinoscitur, perpetuis ibidem temporibus inviolabiliter observetur. Preterea quascumque possessiones, quecumque bona idem monasterium inpresentiarum iuste et canonice possidet, aut in futurum concessione pontificum, largitione regum vel principum, oblatione fidelium, seu aliis iustis modis prestante Domino poterit adipisci, firma vobis vestrisque successoribus et illibata permaneant. In quibus hec propriis duximus exprimenda vocabulis: locum ipsum, in quo prefatum monasterium situm est cum omnibus pertinentiis suis; in episcopatu Vespremiensi ecclesiam Sancti Martini in villa Keurushyg constitutam, in villa Tardi ecclesiam Domini Salvatoris, in villa Tepei ecclesiam Sancte Marie cum universis pertinentiis suis; in episcopatu Geuriensi ecclesiam Sancti Martini in Sabaria, et ecclesiam Sancti Willibaldi, ecclesiam Sancte Marie Capelle, ecclesiam Sancte Marie in Fyzig, ecclesiam Sancti Adalberti in villa Wassyan cum omnibus earum pertinenciis; in archiepiscopatu Strigoniensi ecclesiam Sancte Marie in Wag cum omnibus pertinentiis suis, oratorium in villa custodum porcorum in silva Sely et oratorium in Dinna.||
Ad hec iuxta vestigia antecessoris nostri Paschalis pape, secundum quod a beate memorie Stephano rege statutum est, presenti privilegio statuimus, ut nulli regum, comitum, archiepiscoporum, episcoporum aut cuiquam alii de rebus, que iam dicto monasterio collate sunt et commisse, vel in posterum racionabiliter conferentur minuere liceat aut auferre seu ablatas retinere. Liceat quoque vobis personas e seculo fugientes liberas et absolutas ad conversionem recipere et eas absque contradictione aliqua retinere. Prohibemus insuper, ut nulli fratrum vestrorum post factam in eodem loco professionem fas sit absque abbatis sui licentia de eodem monasterio nisi arctoris religionis obtentu discedere, discedentem vero absque litterarum communium cautione, nullus audeat retinere. Crisma vero, oleum sanctum, consecrationes altarium seu basilicarum, ordinationes monachorum et clericorum vestrorum, qui ad sacros ordines fuerint promovendi, a diocesano suscipietis episcopo, si quidem catholicus fuerit et gratiam atque communionem apostolice sedis habuerit, et ea gratis et absque pravitate aliqua vobis voluerit exhibere; alioquin liceat vobis, quemcumque malueritis, adire antistitem, qui nimirum nostra fultus auctoritate, quod postulatur, indulgeat. Monachos etiam et sanctimoniales eidem monasterio subiectas sine cuiusquam prohibitione vobis regulariter liceat iudicare. Baptismum quoque per ecclesias illas fieri concedimus, in quibus ex more soliti estis antiquitus facere. Nulli quoque archiepiscoporum vel episcoporum liceat in iam dicto monasterio ordinationes facere, seu missas publicas celebrare, nisi ab abbate invitatus fuerit, vel in ecclesiis eidem monasterio subiectis sacerdotem excommunicare, vel abbatem ad synodum vocare sed ea libertate gaudeat quam monasterium Cassinense gaudere dinoscitur. Decime vero Sumigiensis territorii, quas monasterium vestrum per quadraginta annos pacifice tenuit, et concessiones, quas predictus rex Stephanus pro tuitione patrie, pro statu regni et pro augmento fidei Beato Martino concessit, firme vobis et monasterio vestro et illibate permaneant. Ad hec mitram, virgam pastoralem, anulum et alia insignia, que a quadraginta annis retro abbates monasterii vestri, qui pro tempore fuerunt, habuerunt sicut ea de auctoritate apostolice sedis habuisse noscuntur, vobis et monasterio vestro auctoritate apostolica confirmamus. Obeunte vero te, nunc eiusdem loci abbate, vel tuorum quolibet successorum, nullus ibi qualibet surreptionis astutia seu violentia preponatur, nisi quem fratres communi consensu vel fratrum pars consilii sanioris secundum Dei timorem et Beati Benedicti regulam providerint eligendum.||
Decernimus ergo, ut nulli omnino hominum fas sit prefatum monasterium temere perturbare aut eius possessiones auferre vel ablatas retinere, minuere, seu quibuslibet vexationibus fatigare, set omnia integra conserventur eorum, pro quorum gubernatione ac sustentatione concessa sunt, usibus omnimodis profutura, salva sedis apostolice auctoritate. Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit, secundo tertiove commonita, nisi reatum suum digna satisfactione correxerit, potestatis honorisque sui dignitate careat, reamque se divino iudicio existere de perpetrata iniquitate cognoscat et a sacratissimo corpore ac sanguine Dei et Domini Redemptoris nostri Iesu Christi aliena fiat, atque in extremo examine districte ultioni subiaceat. Cunctis autem eidem loco sua iura servantibus sit pax Domini nostri Iesu Christi, quatenus et hic fructum bone actionis percipiant, et apud districtum iudicem premia eterne pacis inveniant. Amen. Amen. Amen.||
Ad te Domine levavi animam meam! Bene valete!||
Ego Urbanus catholice ecclesie episcopus subscripsi. Ego Henricus Albanensis episcopus ss. Ego Paulus Prenestinus episcopus ss. Ego Theobaldus Hostiensis et Velletrensis episcopus ss. Ego Petrus de Bono presbyter cardinalis tituli Sancte Susanne ss. Ego Laborans presbyter cardinalis Sancte Marie trans Tyberim tituli Calixti ss. Ego Pandulfus presbyter cardinalis tituli duodecim apostolorum ss. Ego Melior presbyter cardinalis Sanctorum Iohannis et Pauli tituli Pamachii ss. Ego Adelardus tituli Sancti Marcelli presbyter cardinalis ss. Ego Iacintus Sancte Marie in Cosmydin diaconus cardinalis ss. Ego Gratianus Sanctorum,Cosme et Damiani diaconus cardinalis ss. Ego Rolandus Sancte Marie in Porticu diaconus cardinalis ss. Ego Petrus Sancti Nicholai in carcere Tulliano diaconus cardinalis ss. Ego Radulfus Sancti Georgii ad velum aureum diaconus cardinalis ss.||
Datum Verone per manum Alberti Romane ecclesie presbyteri cardinalis et cancellarii VIII. Idus Maii, indictione quinta, incarnationis dominice anno M.C.LXXXVII., pontificatus vero domni Urbani pape III. anno secundo. [1187. máj. 8.]