Notum sit omnibus presentem paginam inspecturis, quod anno dominice incarnationis M.CC.XXVI. secunda feria post cathedram Sancti Petri Albe, [1226. febr. 23.] in claustro Albensi, placuit partibus compromittere in arbitros sub hac forma: Nos iudices, abbas Plesiensis et prepositus Albensis, iudices a summo pontifice delegati in causa, que vertitur inter abbatem et conventum Sancti Martini ex una parte, et hospitalarios tam Albe quam in Curgou commorantes ex altera, dominus abbas Sancti Martini et sindicus domus et frater Iohannes prior hospitalis, procurator in hac causa, compromiserunt in nobis, scilicet abbate Plesiensi et me preposito et in magistrum Casmirium et magistrum Manassem super omnibus decimis possessionum et prediorum et villarum omnium existentium in comitatu Symigiensi et super omnibus questionibus et expensis, que facte sunt ac petite ab utraque parte a principio litis usque nunc; et pena est apposita ab utraque parte C. et XXV. (centum et viginti quinque) marcarum, in quam pars, que vellet resilire, incideret. Dominus abbas et conventus Sancti Martini obligaverunt pro dicta pena villam Sceuleus cum omnibus suis pertinentiis. Sindicus hospitalis de consensu magistri sui et fratrum suorum commorantium Albe et Curgou et Strigonii et in Oracha et Keztelch obligavit villam Bodogd cum omnibus suis pertinentiis pro dicta pena. In potestate arbitrorum est procedere in modum arbitrii vel arbitratoris procedendo simpliciter et de plano. Statutum est reddere sententiam arbitrii tertia feria post Iudica. [1226.ápr. 7.] Locus Albe. Et ut presens compromissum stabile sit et firmum, paginam istam cum sigillis abbatis et capituli Sancti Martini et fratris Iohannis magni magistri et I(ohannis) prioris Albensis, dicte cause procuratoris, fecimus corroborari et nostris.