Honorius episcopus, servus servorum Dei, venerabili fratri ... episcopo Waciensi et dilectis filiis ... abbati de Peles et ... archidiacono Pestiensi, Vesprimiensis et Waciensis diocesis, salutem et apostolicam benedictionem. Cum olim ... abbas et conventus Sancti Martini de Pannonia super questionibus, motis ab eis contra Vesprimiense capitulum super ecclesia Sancti Salvatoris de Tord et quibusdam decimis de Simigiensi comitatu plene ipsis provenientibus, quas occasione ecclesie Sancti Apollinaris idem capitulum dicitur usurpare, super quibusdam decimis coram dilecto filio nostro G(regorio), Sancti Theodori diacono cardinale, tunc capellano felicis recordationis I(nnocentii) pape predecessoris nostri, lis extitit apud sedem apostolicam taliter contestata, ut si capitulum exceptiones suas, scilicet excommunicationis in personam abbatis et quod homines suos bobus et rebus aliis spoliaverit dictus abbas, posset probare, legitime litis contestatio non valeret, nec non et super quibusdam aliis iniuriis adversus predictum capitulum et causis, quas haberent adversus quosdam alios, archidiaconum videlicet, rectores ecclesiarum et presbyteros ac populos comitatus prefati, ac super quibusdam decimis et rebus aliis ad diversos iudices diversas a sede apostolica commissivas litteras impetrarint, nec per eos super predictis, pro quibus sexdecim annis et amplius asserunt inutiliter laboratum, dicti abbas et conventus suam iustitiam potuerint obtinere: nos de ipsorum et venerabilis fratris nostri ... Strigoniensis archiepiscopi, tunc episcopi Vesprimiensis, assensu tibi, frater Waciensis, et venerabili fratri nostro ... Quinquecclesiensi episcopo et ... abbati de Sancto Gothardo Georiensis diocesis super predictis omnibus sub certa forma negotium duximus committendum. Qui licet non processissent in causa, duo tamen ipsorum certis exceptionibus certum terminum peremptorium, videlicet festum Sancte Pudentiane proxime preteritum, [1226. máj. 19.] partibus assignarunt, quo cum omnibus munimentis et rationibus suis per se vel per procuratores idoneos nostro se conspectui presentarent.||
Comparente igitur parte monasterii et diutius expectante, tandem coram venerabili fratre nostro ... Albanensi episcopo, quem dederamus parti monasterii auditorem, quidam pro Vesprimiensi dumtaxat capitulo comparuit procurator, qui licet coram eodem auditore mandatum sufficiens ostendisset et libellum super predictis et aliis ab alia parte recipiens contendisset aliquantulum cum eodem, ad ultimum tamen dicens, se nolle defendere capitulum supradictum, coram dilecto filio magistro O(ttone) subdiacono et capellano nostro, quem eidem subrogavimus Albanensi, quasdam litteras pro parte capituli revocatorias sue procurationis ostendit, quibus, cum iudicarentur esse suspecte, dictus procurator iuramento prestito fidem fecit. Licet ... monasterii pars instaret, ut cum pars altera contumax existeret, quoad illas decimas, super quibus lis extitit contestata, deberet ad calculum sententie definiri et super eisdem et super aliis vel adiudicari sibi possessio, vel saltem contumaces ex parte altera in expensis prefatos rectores, sacerdotes et alios, pro quibus non respondit dictus procurator, (absentibus incurrendis aggravari): facientes (in iudicando ...) iustitie, de negotio memorato discretioni vestre per apostolica scripta mandamus, quatinus causam super predictis omnibus sufficienter per partes sive per ... reliquam st... instruentes ipsam, si partes consenserint, ... exceptiones ... fine debito terminetis; alioquin eam ad nos sufficienter instructam ad proxime venturum festum Nativitatis dominice [1226. dec. 25.] remittatis, prefigendo partibus terminum competentem, quo nostro se conspectui representent, iustam auctore Domino sententiam recepture. Quod si forte quocumque modo contigerit, ut coram vobis instrui causa non possit, vos quantum de iure poteritis, procedentes, partes nichilominus ad eundem terminum ad nostram citetis presentiam, quo cum omnibus instrumentis et rationibus suis veniant recepture, quod iustum fuerit, et facture nullis litteris obstantibus, si que apparuerint a sede apostolica impetrate. Quod si non omnes hiis exequendis potueritis interesse, tu frater episcope cum eorum altero ea nichilominus exequaris. Datum Laterani, V. Idus Iulii, pontificatus nostri anno decimo. [1226. júl. 11.]