Sanctissimo patri ac domino G(regorio) Dei gratia sacrosancte Romane ecclesie summo pontifici F(irminus) et G(...) abbates de Thata et de Zubur et I(ohannes) canonicus Geuriensis promtissimum famulatum ad omnia et pedum oscula bonorum. Ex parte magistri E(gidii) subdiaconi et capellani vestri, cum esset in Ungaria, recepimus litteras in hunc modum:||
Venerabilibus in Christo fratribus ... de Thata et ... de Zubro abbatibus et discreto viro Iohanni canonico Geuriensi Egidius domini pape subdiaconus et capellanus salutem in Domino. Cum causam inter venerabilem ... abbatem et conventum Sancti Martini de Pannonia ex una parte et nobilem virum Fabianum ex altera super ecclesia Sancti Spiritus cum palatiis et possessionibus suis dominus papa venerabili patri ... episcopo Vaciensi et Warodiensi et de Feldwar abbatibus commisisset terminandam, illis dictam causam non diffinientibus eandem ad examen sedis apostolice remiserunt, quam dominus papa diffiniendam postmodum nobis commisit. Nos vero in actis dictorum iudicum a domino papa delegatorum sub bulla domini pape perspeximus contineri, quod iidem propter multiplicem contumaciam dicti Fabiani possessionem petitarum rerum adiudicaverunt causa rei servande abbati et conventui supradictis eundem cum expensis propter dictam contumaciam supradictis abbati et conventui condempnantes. Postmodum vero auctoritate domini pape dictus Fabianus iuxta mandatum apostolicum pluries legitime citatus a nobis, ut per se vel procuratorem idoneum responderet supradictis ... abbati et conventui coram nobis, quia nec per se comparuit, nec per legitimum responsalem: ipsum propter tantam contumaciam iam dictis abbati et conventui condempnavimus ad expensas et excommunicationis sententiam promulgavimus in eundem, abbatem conventum sepedictos in possessionem dictarum rerum ex secundo decreto secundum iuris ordinem imponentes. Quare auctoritate domini pape, qua fungimur, firmiter vobis mandamus, quatenus sepedictos, abbatem et conventum in dictam possessionem legitime inductos, sicut iustum fuerit, tueamini, contradictores, si qui fuerint, vel rebelles per censuram ecclesiasticam firmiter compescentes.||
Termino itaque a nobis dicto F(abiano) assignato ad exequendum mandatum nobis iniunctum nuncius eiusdem F(abiani) ad presentiam nostram veniens appelavit in hunc modum:||
Ego Fabianus comes presens scriptum aspicienti significare proposui, quatenus super causa, que vertebatur inter me et ex alia parte inter abbatem Sancti Martini, liberum et immunem me fore assero et nullius citationem sensisse. Legatus terram Ungarie nunquam intravit, nec ipse legatus erat, sed sub falsa spe fuit functus in partibus istis. Preterea litteras domini pape non ostendit, cum non habuit. Unde prefatum abbatem et eiusdem conventum coram auctoritate domini pape in die nativitatis Domini appello. Actum publice Strigonii. [1231. december. 25.]||
Nos vero videntes dictum Fabianum et complices suos paratos modis omnibus nobis resistere, dictam causam ad pedes Sanctitatis vestre remisimus.